“Jadi nini ma dompak sidea: mase mabiar hanima parhaporsayaon na etek?” (Mateus 8:26a)
Domma hundokah susian in rap pakon Tuhan Jesus. Domma humbuei ididah sidea halongangan na binahen-Ni ampa hagogohon-Ni.
Santorap on rap saparau do sidea pakon Tuhan Jesus, lang patut be namin mabiar sidea. Tapi etek janah galek do haporsayaon ni sidea ope. Banggalan do ididah hagogohon ni gilumbang ase hagogohon ni Tuhan Jesus. Lupa bani gogoh ni Tuhan Jesus age pe ilambung ni sidea do Ia, biar do hansa sidea atap sonaha harom solu (parau) ai.
Hita pe anggo roh parmaraan na hebat hu banta, mintor roh do biar ai. Lupa diri mardingat Tuhanta na margogoh ai. Dompak sihabiaran ai do napingkiri.
Ai ma galek pakon etek ni haporsayaonta ai. Tapi ingat ham ma sonaha pe masam ni sihabiaran ai ilambungta do Tuhan Jesus. Roh do Ia bani panorangni laho mangurupi hita, hataonkonni ma hu banta: “Mase mabiar hanina parhaporsayaon na etek?”
Tonggo seng tarbahen sompong mangkaporsayai na i lambungta do Tuhan Jesus, anggo lang somal hita ari-ari mangahapkon na i lambungta Ia. Anggo somal do iahap hita na ihasomani Tuhanta do hita seng pala rusak hita age sonaha parmaraan roh hu banta, gabe torang do uhurta mardingat Tuhanta.
Songon na marparau (markapal) do hita mamontas goluh on, manuju dompak labuhan goluh sisadokah ni dokahni. Buei do gilumbang na etek age na banggal bani goluh on. Logou na suhar pe buei do. Na patut do bobor janah rusak jolma anggo seng idingat na i lambungni do Tuhan Jesus, simada hagogohon na tarlobih ai. Tapi anggo tenger do uhurta Tuhanta do i lambungta, sonang do uhurta.
Ai ma surung ni na porsaya marimbang na so porsaya mandompakkon sibontason na mahol bani goluh on.
Ham Tuhan Naibata Bapanami na i nagori atas! Galek janah etek do haporsayaonnami. Sasap Ham ma dousanami pasal ai. Patenger Ham ma uhurnami Bamu, age gilumbang aha pe roh. Amen.
Haleluya No. 117: 1, 2, 4. Pitah Jesus Hubaen Hasomanku
~Pdt J Wismar Saragih, Tadah ni Tonduyta
Recent Comments