“Ase marpesta ma hita ulang marhiteihon ragi na usang, sedo marhitei ragi hajahaton atap hasamboron, tapi marhiteihon na so marragi, ibagas putih ni uhur pakon hasintongan”. (1 Korintus 5: 8)
(Terjemahan baru, LAI 1976, “Ai pe marpesta ma hita, ulang marhitei na migar na dob madokah, …… tapi marhitei ruti na so niigaran ma ibagas hasusion ampa hasintongan. (2 Mus. 12:3-20.)
Domma matei biribiri paska banta, ai ma galangan pasal dousanta ai domma matei Tuhan Jesus Anak ni biri-biri ni Naibata hani hayu parsilang. Tapi seng boi ijolomi hamatean Tuhan Jesus, ai Bani do hagogohon ni goluh na sadokah ni dokahni.
Halani ai ma ase puho do Ia bani ari patoluhon. Sonari na manggoluh do Tuhan Jesus na boi mambere partolongan bani sagala na porsaya Bani. Ijamin ma pasal hasasapan ni dousanta. Itogu ma hita bani goluh na pintor janah na borsih. Tuhanta ma hasomanta mangimbang dousa pakon sagala parlajoan. Itogu ma hita humbani hamatean das hu hagoluhan na sadokah ni dokahni. Marpesta ma hita.
Manrogop ma hita ilobei ni Sipaluah in, na matei halani hita janah mulak manggoluh ase dong mangurupi hita. Ase marpesta ma hita sedo marhitei ruti na marnamigar marsaor dousa atap hajahaton.
On do pestanta, anggo boi mogap haganup dousanta bani daroh ni Tuhan Jesus. Anggo sonai marjuang ma hita manlawan sagala dousanta, manlawan gijang ni uhunta, uhur haut pakon uhur na mabutak. Ari-ari ma hita laho bani Tuhan na manggoluh in, ase margogoh hita mardalan bani hasintongan. Ulang be mulak hu pudi hita bani na niigaran ni hajahaton. Tapi manggoluh ma hita ibagas na mangidangi Tuhanta lanjar mangihutkonsi.
Ham Tuhan Jesus! Ham do Kristus na manggoluh, na manjalo sagala ra roh hu Bamu. Jalo Ham ma pakon ahu. Pasu-pasu Ham ma ahu. Amen.
Haleluya No. 69 :1, 2: Pesta Paska Hatuahon
1. Pesta Paskah hartuahon, Pesta Paskah haluahon,
Humbai hamateian in, humbai hamateian in,
Tuhan Jesus paulakkon hagoluhan, hasonangan
Bai ganupan jolma in.
2. Talu ho, nagori toruh, seng na boi be jolomonmu,
Raja Sipagoluh in, raja Sipagoluh in.
Hamateian, hamagouan seng be pala habiaran;
Domma talu in ganup.
Recent Comments