Humbani bujur ni uhur nasiam ma horjahon nasiam sagala silahoan, songon na bani Tuhan, sedo bani jolma. (Kolose 3: 23)
Haganup susian ni Tuhan Jesus (Kristen) na porsaya sai sihol bahenonni do horja na banggal bani Tuhan Jesus, tanda tarima kasih ni uhurni. Maningon laho bani tanoh ni sipajuh begu-begu mandalankon pangarahon atap mandalankon horja na banggal-banggal i kuria.
Tapi borat do horjani patorsa tongah jabuni (rumah tanggani), horja ari-ari i juma, i kantor, i parsikolahan, i kodei pakon na legan. Iahapkon seng boi be ibahen atap aha horja bani Tuhan. Ambah ni ai seng dong sikolahni dompak jai.
Hata ni Naibata na tarsurat iatas in lobei tangihon ham: “Humbani bujur ni uhur nasiam ma horjahon nasiam sagala silahoan songon na bani Tuhan, sedo bani jolma“. Idingat apostel do horja na marbagei-bagei in, parjuma, parboniaga, na marhorja i kantor, buruh (gajian), atap majikan (tokeh) i darat age laut, sonari hataonkonta ma age i awang-awang pnl, i kota atap i dusun. Ididah janah ibotoh Tuhan do atap na sintong horjanta. Anggo panonggor ni majikan gati daoh humbanta, seng sai ipaidah-idah. Tapi Naihata ididah do parhorjanta atap sintong ni uhurta ibotoh do.
Sintong ni uhur mangkorjahon horja pakon langkah bani tanggung jawab, ibotoh Tuhanta do. Halani ai anggo halak na porsaya songon na bani Tuhan do ia marhorja, sedo songon na bani jolma, age pe horja ni jolma ihorjahon. Sedo na taridah sihabiaranni, bani na so taridah do ia martanggung jawab.
Jolma sisonai ai sai dear janah sintong do horjani ari-ari, malas ma homa uhur ni tokehni (majikanni), ai sai ihorjahon do horjani ai tontu-tontu janah pongut ni uhurni.
Hirahon hita ma na marhorja bani Tuhan do hita ari-ari. Jadi uhurmu pe sonang ma.
Ham Tuhan Naibata! Bere Ham ma bannami uhur martanggung-jawab bani sagala horjanami, ase malas homa uhurnami bani sagala horjanami. Amen.
Haleluya No. 7: 3, 4. Porini Dong Marribu Hali >>
3. Ulang ma modom ho tonduyhu, sai puho ho, sai hehe ma;
Pongkut ma ho bani horjamu, sai puji Tuhan Naibata;
Sai baen ma gok ni pandeimin, laho mamuji Tuhan in.
4. Tarima kasih ma uhurhu, Bamu o Naibata tongtong;
Ibahen dearni layak-Mu, binere-Mu hubangku on;
Ai ipatudu Ham tongtong ganup na porlu bangku on.
Recent Comments