“Tapi sedo marguru bani uhur-Hu, uhur-Mu do! (Mateus 26 :39b)
Ai ma ujung ni tonggo ni Tuhan Jesus i pohon Getsemane bani paruntolonni na parah ai. Sonai do tonggoni pakon pargoluhonni ari-ari: Sedo marguru bani uhur-Hu, uhur-Mu do. Sonai ma uhur-Ni ari-ari pasangapkon Naibata bani sagala pingkiranni pakon langkahni.
Sonai do homa ipodahkon banta bani tonggo na pansing ai: “Sai saud ma harosuh ni uhur-Mu i nagoritongah on songon na i nagoriatas”.
Ganup hita susian ni Tuhan Jesus nuan on (Kristen), patut pagomgomkon rosuhta bani rosuh ni Naibata. Jadi porini sundat pe sura-suranta sai saud ma sura-sura ni Naibata. Lang be pala marpusok ni uhur hita. Ai ibotoh hita, ia itongos (ipaturut) Naibata atap aha na borat banta, botoh hita sada do sura-sura ni Naibata, laho patorsa hita do, laho pabagas haporsayaonta do. Pandei do Naibata, patudu na masa banta ase gabe madear ujungni, pasirsirhon hita bani Harajaonni na i nagoriatas.
Sedo pitah sitaronon na banggal, dihut do siporsanon ari-ari pasirsirhon hita bani tujuan banggal ai. Halani ai maningon ari-ari do hita marlajar, manguhurhon janah manghatahon: Sedo marguru bani uhurhu, uhurmu do.
Uhur na sonai ai ma pasonang uhurta age dong na jut atap na sundat (gagal) sura-suranta. Mintor tarapoh do uhurta mangkatahon: Seng marosuh Naibata. Ibotoh Naibata mambahen sidearan bangku, ninuhur.
Ase bani paruntolonta ari-ari ingatonta ma pagomgomkon sura-suranta bani sura-sura ni Naibata. Sura-sura ni Naibata do iatas.
Ham Tuhan Jesus! Urupi Ham ma hanami ase unduk hanami bani harosuh ni Naibata, songon Ham sandiri na unduk bani Naibata. Amen.
Haleluya No. 118: 1, 2. Tuhan Jesus Siparmahan >>
1. Tuhan Jesus Siparmahan ganup biri-biri do.
Jesus gok Bamu uhurhu, sai irikkononku Ham
Sai irikkononku Ham, sai irikkononku Ham.
Jesus gok Bamu uhurhu, sai irikkononku Ham.
2. Bai musimni sipangagou, Ham panjaga na gogoh.
Anggo bokas-Mu hu tonggor, sai irikkononku Ham,
Sai irikkononku Ham, sai irikkononku Ham.
Anggo bokas-Mu hutonggor, sai irikkononku Ham.
Recent Comments