“Domma sungkup bam Idop ni Uhurhu”. (2 Korintus 12: 9)
Bani 2 Korintus 12 on boi ibasa hita, sonaha Apostel Paulus tardokdok hu nagoriatas janah mambogei hata na so boi luaronkon in jolma. Marhiteihon pangungkabon ai boi ma namin gijang uhur ni Apostel Paulus. Tapi ulang gijang uhurni, ipaturut Naibata do bani sitaronon ari-ari, ai ma duri nini manojok angkulani.
Nasiam hasoman! Tolu hali pala ipindouhon Apostel ai ase misir humbani duri ai, tapi seng ipaisir Naibata, age pe sonai harga ni apostel ai bani Naibata, pala iboan ia hu surga lapis patoluhon, aha do balos ni Naibata bani tonggoni na tolu hali ai? Ai ma ayat na tarsurat iatas on: “Domma sungkup bam Idop ni Uhurhu“.
Dihut do hape sitaronon masuk bani idop ni uhur ni Naibata. Gati do hita isogopi malas ni uhur, halani hasurungan atap pasal aha pe, janah malas ni uhur sisonai ai gati do ai salih gabe gijang ni uhur. Gijang ni uhur ai mamboan jolma hu hamagoan, halani ai do hape ase ipaturut Naibata dong sitaronon ni Apostel Paulus ari-ari.
Nini Tuhan Jesus pe dong do silangta ari-ari mangihutkon-Si, ningon porsanon do ai. Dihut do ai idop ni uhur ni Naibata ulang gijang uhurta atap pasal aha pe, ningon porsanonta do ai laho mangihutkon Tuhan Jesus.
Na minsah-insah do uhurta ampa pangahapta ari-ari humbani sitaronon na sada hubani sitaronon na sada nari. Tapi ulang haru atap sunsah ni uhur ai mangambat hita mangihutkon Tuhanta, paboan-boan hita ma silangta ai laho mangihutkon Tuhanta Jesus, nini Tuhanta: “Sagala na mangirikkon Ahu, ipamalang ma dirini, iporsan ma silangni iirikkon ma Ahu” (Mat. 16 : 24).
Ham Tuhan Jesus! Pargogohi Ham ma ahu mamorsan silangku afi-ari laho mangihutkon Ham, Amen.
Haleluya No. 107: 6,7. Irikkon Nasiam ma Au >>
6. Na manghargahon hosahnin, in do mansedahonsi;
Sagala na marnalang in, in do pagoluhkonsi.
Na so mamorsan silang in, na so talup be Bangku in.
7. Marmogah-mogah hita bei, lao mangihutkon Jesus.
dagingta ‘ge tonduyta per tulakhon lah bai Jesus;
Ai na mangengkar Tuhan in, seng dapot hasonangan in.
Recent Comments