“Tapi dihut ma hanima manaksihon”. (Johanes 15: 27)
Anggo domma iahapkon hita holong ni atei ni Naibata banta marhitei Tuhan Jesus, ijalo hita gabe niombahni, ai do patubuh uhurta manaksihon Tuhanta.
Sonaha ma panaksihonku? Atap sonai nimu. Urah do balosni ai: Saksihon ham ma horja ni Tuhan Jesus ibagas uhurmu.” Parmabuk hinan gabe lang be marosuh minum-minum; parladung gabe parhata sintong; paruhur haut gabe pambere; sapari pahiri Naibata, sonari pasangap Naibata.
Pangalamanta ibagas pardomuan pakon Tuhan Jesus, ai do saksionkonta marhitei hatanta ampa parlahouta. Ija do hita gabe saksi? I rumahta ma lobei, dob ai sindohor marrumah, hasoman sahuta, hasoman sakuria, ai pe ase na legan atap ampa ise hita pajumpah.
Anggo sedo pangahapta isaksihon hita, pambotohta hansa, saksi palsu do hita na patut uhumon. Buei do halak na manaksihon Tuhan Jesus idarat ni pangahapni. Seng sonai anggo saksi na botul, na pag marbija ma ia paboa sintong hatani. Bani susian ni Tuhan Jesus ihatahon do: “Gabe saksingku ma hanima”.
Ase anggo domma hita sintong gabe susian ni Tuhan Jesus (Kristen) salih do hita homa gabe saksi-Ni. Saksi ni holong-Ni, saksi ni idop ni uhur-Ni, saksi ni lumbang ni uhur-Ni, saksi ni layak-Ni, saksi ni toruh ni uhur-Ni, laho paluahkon hita.
Sipindoonta do humbani Naibata, ase ibere banta Tonduy saksi songon na bani apostel na ija, ase boi hita saksi na botul marhitei hatanta ampa parlahouta, ibagas parsaoranta ari-ari.
Ham Tuhan Jesus! Bere Ham ma idop ni uhurMu, ase boi banami gabe saksi ni holong-Mu, ibagas goluhnami ari-ari. Amen.
Haleluya No. 5 : 3,6: Hupuji Holong ni Atei-Mu >>
3. Huahap maningon mar-Tuhan, ningon manggoluh au Bamu:
Seng jumpah au be hagoluhan, anggo seng pinasirsirMu:
Sai Ham na baen parsarananku, sai gok Bamu mando langkahku.
6. 0 Jesus, Goran-Mu uhirhon, bagas, torang bai uhurhon,
Ase tarsurat ilobeihu holongni atei-Mu tongtong,
Hatangku ampa parlahouhu, ningon ipuji do Goran-Mu.
tnt160531
Recent Comments