“Tuhan, ajari ham hanami martonggo”! (Lukas 11 : 1)
Dong do deba halak Kristen, sihol do ia namin martonggo hubani Naibata, tapi seng ibotoh sonaha martonggo. Sonaha do diri marlajar martonggo? Sonai ma homa susian ni Tuhan Jesus ijia, nini dompak Tuhan Jesus: “Tuhan, ajari Ham hanami martonggo!”
Sonaha do pangajari ni Tuhan Jesus banta martonggo sonari on?
Itongos do Tonduyni hu banta, Tonduy ai paahapkon bamu naija na porlu bamu, tonggoonkonmu. Hunlobei do ididah dousamu pakon hahuranganmu, dob ai iajari ma ham mangkatahon ai bani Naibata marhitei hata na saluyu: “Ham Tuhan Naibata domma hulanggar titahmu mardousa do ahu dompak Ham, sasap Ham ma dousangku”! Ipatugah Tonduy ai do bamu holong ni atei ni Naibata, iajari ma ham mangkatahon tarima kasih: “Ham Tuhan Naibata, tarima kasih ma Bamu halani holong ni uhurmu bangku”!
Jadi martonggo ma ham bani Naibata. Seng pala laho uhur ni Naibata dompak hatanta na luar ai, atap paratur ni hatanta, dompak hata ni uhurta do balos ni Tuhanta. Naibata domma ibotoh hinan na porlu bamu paima mangindo ham.
“Ajari Ham hanami martonggo”! Dos do namin artini ai pakon jadihon Ham hanami gabe niombahmu. Lambin ipatuduhkon Tonduy ai ma, dousamu pakon hagalekonmu, jadi ibere ma bamu gogoh mantaluhon ai.
Anggo ipindo ham ma partolongan ni Naibata, ulang ma ipingkiri ham na legan. Ingat ham ma bagah-bagah-Ni, sabar ham paima balos-Ni. Jadi husiponkon ni Tonduy ai do bamu balos ni Naibata. Ingatonta do: Martonggo, artini dumpar marsahap pakon Naibata. Porlu do parhundul atap parjongjong na tipak pakon na hormat, lobih hormat bani na mangadap parkuasa na i tanoh on.
Tarima kasih ma Bamu Naibata, halani iajari Ham hanami martonggo, sai itangihon hanami ma pangajaran-Mu. Amen.
Haleluya No. 108 : 2.6: Sanggah Holong Tong Tuhanta >>
2. Sai tundali na madorsa, sai dompakkon Naibata,
Tanda na tongon porsaya ho bai Tuhan Naibata.
6. Sai martonggo ulang holang, ase tambah gogohmin,
Janah sai tongtong ho sirang humbai ganup munsuhmin.
tnt160526
Recent Comments