“Ondoskon nasiam ma daging nasiam bahen galangan na manggoluh, na susi, na hinarosuhkon ni Naibata, ai ma hadaulaton ni na maruhur”. (Roma 12: 1)
Terj baru (1976) “Ondoskon nasiam ma angkulanasiam gabe galangan na manggoluh, na susi anjaha na hinarosuhkon ni Naibata, in ma parsombahonnasiam na maruhur”!
Tuhanta Jesus do na dob mangondoskon dagingni bahen galangan hubani Naibata halani hita. Galangan pardousaan, ase maluah hita humbani dousa, halani idop ni uhur-Ni ampa holongni atei-Ni na banggal in.
Ai do nidingat ni Apostel Paulus ase iojur hita mangondoskon dagingta hubani Naibata, sedo maningon pintor matei hita songon Tuhanta, ase “galangan na manggoluh” do ihatahon.
Anggo galangan maningon na pansing do. Anggo galangan na manggoluh ma dagingta (badanta) bani Naibata, maningon pansing do ai ulang be ipaturut hita angkulanta mangkorjahon dousa pakon sagala habutakon, tapi mangkorjahon harosuh ni Naibata ma, pasangap Naibata ma. Anggo idalankon ham horjamu ari-ari ibagas tanggung-jawab na gok, artini sintong uhurmu pakon langkahmu, sintong homa sahapmu, na pasangap Naibata do ham ijai. I juma, i parsikolahan, i kantor atap i parboniagaan ham, atap ija pe tene, i rumah atap i partumpuan: Porlu iahap uhurta bani panorang-panorang ai: mangkorjahon harosuh ni Naibata do ahu, na mangidangi Naibata do ahu, porlu malas uhur ni Naibata bani panggulmiton ni uhurhu pakon angkulangku.
Ingat ma, ipaidah-idah Naibata do ham atap ija pe ham, ididah homa haporsayaonmu age sadihari pe. Sedo pitah sanggah roh ham hubani Naibata ibagas tonggomu, tapi age sadihari pe ipaidah-idah do ham ampa uhurmu, ipatangi-tangi ampa hatamu atap pakon ise pe ham marsaor (kontak). Seng ham mardomdom? Seng ra ham mambalaskon na jahat imbang ni na jahat? Basar do ham age dompak na marsogam ni uhur dompak ham? Porini pe dong na mandari ham mangkorjahon dousa, martonggo do ham mangindo gogoh manlawan ai?
Ra balosmu pasal haganupan ai: Mahol do ai! On do hansa dalan: Ingat ham ma Tuhan Jesus na dob mangkaholongi ham. Pindo ham ma Tonduy na Pansing ase iajari ham pasangapkon Naibata. Ganup do tarbahen hita marhiteihon Kristus.
Ham Tuhan Naibata, urupi Ham ma ahu mambahen harosuhmu atap ija pe ahu age sadihari pe. Amen.
Haleluya No. 153: 1, 3.
Recent Comments