Ai atap ija pe tumpu dua atap tolu halak marhiteihon Goranku, ijai ma Ahu itongah-tongah ni sidea. (Matius 18: 20)
Seng itadingkon Tuhan Jesus Kuriani age na etek. Dohor do Ia bani siminikni mamboan pasu-pasu-Ni pakon partolongan-Ni. Halani ai lang pala mabiar, lang pala hitir sidea, boi sonang sidea martumpu janah martonggo hu Bani.
Aha do arti ni na martumpu marhitei goran ni Naibata? Anggo idingat hita hata pasu-pasu siap mungkah ni parmingguonta: “Marhiteihon goran ni Naibata bapa, Anak pakon Tonduy na Pansing”, parmingguon ma sada partumpuan na marhitei goran ni Naibata. Partonggoan i gareja atap i rumah-rumah pe tong do ai partumpuan marhitei goran ni Naibata. Ase sagala partumpuan na mangindahi pardomuan pakon Naibata partumpuan na marhitei goran ni Naibata do ai. Age buei atap otik pe na martumpu ai, age pe tolu halak atap dua halak hansa na martumpu ai, iparbagah Tuhanta itongah-tongahta do Ia.
Halani ai malas ma uhurta mangayaki partumpuan pongkut janah hormat ma hita manangihon hata ni Naibata janah humbani tongon ni uhurta ma mandoding mamuji Naibata. Ambah ni ai anggo dong jut ni uhurmu atap haru ni uhurmu, ayaki ham hasoman Kristen na mangkaholongi ham, turi-turihon ham bani pusok ni uhurmu, ase tumpu nasiam age na dua ai gelah, ase tapang nasiam martonggo bani Naibata. Tenger ma uhurmu itongah-tongah nasiam do Naibata bani panorang ai, boi ma itangihon tonggo nasiam. Gabe sonang ma uhurmu.
Ham Tuhan Jesus! Tarima kasih ma Bamu, halani ra do Ham rap pakon hanami. Sai iojur Tonduymu ma hanami hubani partumpuan na marhitei goranmu. Amen.
Haleluya No. 17 : 1, 2. Jesus Roh Hanai Hujon >>
1. Jesus roh hanai hujon, lao mangindo hagoluhan
Ai pe roh ma Ham hujon, janah baen ma pardomuan
Tonduy-Mu pa tonduy nami ulang merap uhur nami.
2. Golap uhurnami on, nin homa pambotoh nami.
Anggo seng Tonduy-Mu in, paliharhon uhurnami.
Ningon Ham do patureihon dalan sidogeionnami.
Recent Comments