Jadi taridah ma bani sada malekat hun nagori atas, laho mampargogohi-Si. (Lukas 22: 43)
Bani panorang haparahanni paruntolon ni Tuhan Jesus i pohon Getsemane, laho mamutuskon langkahni laho hu hamatean, ijai ma isuruh Naibata malekatni margogohi Tuhan Jesus. Ai ma homa balos ni tonggoni hubani Naibata na mangkatahon: “Anggo tarbahen salpuhon Ham ma Bapa panginuman on humbangku, tapi sedo guru bangku, Bamu do”.
Ai maningon taronon ni Tuhan Jesus do na marsik ai das hamatean, matei tarsilang, se maluah hita jolma. Halani ai ma ase isuruh Naibata malekat ai patotap uhurni, ase saud manaron sitaronon ai.
Ra do Naibata mangurupi hita, margogohi hita ibagas parlajouan na roh hu banta. Tapi maningon marondos botul do hita hu Bani, anjaha ibotoh hita unduk bani harosuh ni Naibata. Ibagas sagala parlajoan anggo ididah hita golap ilobeita, dilo hita ma Naibata pakon Tuhanta mangkasomani hita, margogohi hita, ase ulang talu hita, tapi ase monang. Dob ni toguonni ma hita, marhitei tanganni na gogoh ai, ase das hita use hubani malas ni uhur na botul marhitei Tuhan Jesus Kristus.
Ase bani panorang sitaronon ampa parlajoan na roh hu banta, sai mangkawah ma hita bani Naibata. Tenger ma uhurta isarihon do hita. Pio hita ma Ia ase iurupi hita age marhitei sitaronon. Gabe pujionta ma Goranni.
Tapi bani sitaronon atap parlajoan na roh hu banta, ulang ma itonggor hita dirinta na galek on, tapi kawahkon hita ma Naibata, na boi margogohi hita pakon mantaluhon imbangta. Ibagas panorang sisonai ma ulang lupa hita pagomgomkon rosuhta hubani rosuh ni Naibata. Ulang pangindoanta na saud, uhur ni Naibata ma na saud. Ibagas ai sabar ma hita paima panorang ni Naibata, mambere sipargogoh banta.
Ham Tuhan Naibata, Bapanami! Tarima kasih ma Bamu halani seng itadingkon Ham niombahmu, na ibagas parlajoan, napuji ma goranmu. Amen.
Haleluya No. 134: 1 – 3. Ambit Lang Ham Rupeihu, ale Jesus >>
1. Ambit lang Ham rupeihu ale Jesus,
jaha daroh-Mu manghakui ahu
mintor huja ma ahu na mardousa, marhaporusan.
2. Ai seng be dong na songon Ham Tuhanku,
na parlunggarhon pusok ni uhurhu;
Sahalak Ham do sipasonang ahu, hagoluhanku.
3. Halani ai hupuji Ham, o Jesus,
ai dihut au itogu Ham, Tuhanku,
bai partumpuan ni ganup tinobus, ibaen daroh-Mu.
23 Desember: Mangirikkon Jesus Ibagas Malas ni Uhur >>
<< 21 Desember: Paturut Hatani pa Tonduyni Marhorja Ibagas Dirimu
Recent Comments