10 Desember: Mase Manasap Dosa ni Hasoman

Seng iparimbagaskon hasalahan ni hasoman (1 Korintus 13: 5d)

Anggo dong hasalahan ni hasoman dompak hita, somal do ihatahon hita: Sonaha do pangkalupahon ai sonai parah ni? Mase sonai ninta? Halani otik do holongta. Anggo parholong do hita seng ipadingat-dingat hita salah ni hasoman, sonai do biak ni holong ai. Ai seng iparimbagaskon hinan ai. Dulmit do hasalahan ni hasoman bani parholong, seng iahap bagas pangonaini, ai seng iparimbagaskon. Halak parholong seng ra ia papingkir-pingkir na jahat ibagas uhurni.

Anggo ipingkiri hita gati na jahat dompak hasoman, gabe uhurta do use rumah ni hajahaton, sedo uhur ni halak ai. Anggo sonai gabe songon baliang panjujung do hita (suali) pajujung-jujung na mangir ni hasoman.

Ningon sai uji hita do mamingkiri sidearan dompak hasoman, na madear ma ipaboan-boan hita bani ulunta jadi hadearon dompak hasoman mando na ipingkir-pingkiri hita.

Ai ma dalan na binahen ni Naibata dompak hita, sanggah pardousa hita, maidop do uhur-Ni mangidah hita, isasap dousanta, seng idingat be dousanta, dob ibere hasasapanni marhitei daroh pangkopkopon ni Tuhan Jesus. Dob isasap dousanta, ibere ma pasu-pasu-Ni bani goluhta.

Hunjai ma hita marlajar, songon pambahen ni Naibata dompak hita ase sonai ibahen hita dompak hasomanta na mambahen na jahat dompak hita. Pindoonta do holong ni Naibata banta, ase holong homa uhurta dompak na mambahen na jahat ai banta.

Sonai ma namin tong, mintor idingat hita holong ni Naibata banta pardousa on, ase mintor roh holong ai banta. Ra do Naibata mangurupi hita pasal ai, ai holong do uhur-Ni banta, isasap do dousanta. Tontu malas uhur-Ni anggo iusihi hita la manasap pipot ni hasoman. Seng iparimbagaskon bapani hasalahan ni anakni na magou ai. Seng iparimbagaskon Naibata hasalahanmu, ham pe ulang iparimbagaskon ham salah ni hasoman dompak ham.
Ham Tuhan Naibata! Urupi Ham ma ahu ase ulang huparimbagaskon salah ni hasoman dompak ahu, ai Ham pe seng iparimbagaskon Ham salah pakon dousangku haganupan. Amen.

Haleluya No. 133: 1,5, 12: Holong do Atei >>
1. Holong do atei ni Naibatangku
parholong atei mangidah au.
Ai ipasirsir do haluahonku
marhitei Jesus Anak-Ni in.
5. Itaron Jesus do hamateian,
manggalar utang ni dousangkin.
Ai do ‘se ningku tong:
Holong do atei ni Naibatangku mangidah au.
12. Sai pujionku do uhur holong,
ni tinuduhkonni Naibata.
Ai do ‘se ningku tong:
Holong do atei ni Naibatangku mangidah au.

11 Desember: Monang Manlawan Diri >>