27 Agustus: “Jaga ma nasiam….maruhur jahat”

 

“Jaga ma nasiam sanina, ase ulang dong sada pe humbani nasiam na maruhur jahat, na so porsaya, na manundali Naibata na manggoluh in”. (Heber 3 :12)

Hita halak Kristen maningon ingatonta do, halak na galek do hita, halak pardousa do. Dunia on tongtong do manggompangi hita, atap sadihari dong dalanni masuk hubagas uhurta. Halani ai ningon jagaonta do ase ulang masuk uhur jahat ai hubagas uhurta, ai ma anggo dong pangkurangi ni uhurta dompak Naibata, songon halak Israel sanggah i halimisan.

lurupi Naibata do halak Israel marulak-ulak. Ibobahon sidea hun Masir, ipaluah humbani tentera ni Parao. Isarihon do bah inumon ni sidea marhitei si Musa, ibere do ruti hun nagoriatas (manna) bahen panganon ni sidea. Ididah sidea do sonaha idop ni uhur ni Naibata Jahowa bani sidea anggo ipio sidea Naibata. Jadi dob lang be mardalan bah na lihou ai, lupa ma sidea mangindo use ase ibere Naibata. Lambin manendel ma uhurni dompak Naibata na maridop ni uhur ai humbani na dob in, ihatahon ope: “Matei horahan ma hanami pakon niombah nami i halimisan on”. Ihutuk do use Naibata na dob paluahkon sidea humbani parjabolonan Masir ai.

Buat hita ma parlajaran humbani barita ni halak Israel ai. Hita pe seng holong uhurta bani Naibata, na jahat do hita, itundali hita do Naibata. Galek do hita manlawan parlajoan. Naibata do hansa gogohta.

Anggo roh uhur na jahat hubagas uhurta, ingat hita ma dohor do Naibata i lambungta. Ra do Ia mangusir tonduy na jahat ai humbagas uhurta. Ipaingat Tonduy ni Naibata do hita marhitei Hata na tarsurat in. Jaminan do banta hata on: “Pala do ibere Anakni sisada-sada in, ase ulang magou sagala na porsaya“.

Na porlu tumang banta dompakkon hita ma Naibata, tundalhon hita sibolis. la aha pe na masa banta dompakkon hita ma Naibata, ai holong do uhur-Ni banta.

 

Ham Bapanami na i nagoriatas! Domma ibere Ham ahu idop ni uhur-Mu, bahen Ham ma ase ulang ganggang ahu hun Bamu. Tonduy-Mu ma mambahen ulang rotap haporsayaonku hu Bamu janah sai tenger ma uhurhu bani sagala bagah-bagah-Mu. Amen.

Haleluya No. 121: 1-3: Jesus Goluh ni Tonduyhu >>
1. Jesus goluhni Tonduyhu, ham do haporusankin.
Anggo tumpu bai tonduyhu bolis pakon setan in.
2. Jolom au Jesus Tuhanku, jolom au sai tongtong.
Ulang sirpang be naiheihu humbai dalan na sintong.
3. Bai musim ni haba-haba pinaroh ni musuhkin,
Togu au das hu labah bani parsaranan in.

28 Agustus: Panandaon Diri pakon Harosuh ni Naibata >>

<< 26 Agutus: Paujungonni Jahowa do Horjani Ibagas Dirinta

tnt160827