“Anggo ibahen ham pesta mangan-mangan, dilo ham ma na masombuh, na marsining, na repat pakon na mapitung, jadi martuah ma ham ijai”. (Lukas 14 : 13,14)
Iipindo uhur ni Naibata do ase dihut hita mansarihon na sosak. Porlu tolongonta na masombuh, na marsining, na repat pakon na mapitung, na marsitaronon bani daging pakon tonduy pe. Boi do homa ipadalan hita on marhitei na manumpaki Kas Idop ni Uhur, atap horja sosial na legan, laho mangurupi na marhahurangan i tanoh on.
Marhitei hata na i atas in iojur Tuhanta do hita dumpar pakon na marhahurangan ai. Ia lang pe tarbahen ham mandilo sidea, bahen ham ma na pamalas uhur ni sidea. Roh ma ham marayak sidea mamboan siluah na pamalas uhurni. Dihut ma hita pahampung sitaronon ai iahap.
Ia ham na jorgit, ibotoh ham do, sedo na marosuh sagala na marsitaronon ai bani sitaronon ai, tapi domma roh, ningon ijalo. Bamu pe boi do roh sitaronon na sonai. Tapi ham jorgit, boi do ham homa mangurupi na marhahurangan. Ai do ase ipindo Tuhanta pangurupimu bani na marsitaronon, na marhahurangan. Ai porini ham sonai, ai lang ipindo uhurmu do partolongan?
Hurang ni holong pakon idop ni uhur do mambahen lang hita ra mangurupi na marhahurangan, tapi hurang haporsayaon do ai homa bani idop pakon holong ni uhur ni Tuhan Jesus na banta sandiri. Anggo bagas iahap hita holong ni Tuhanta, lang tarbahen lang marholong pakon hita dompak hasomanta. Tuhan Jesus do gurunta, susianni do hita. Anggo idingat hita gati hata-Ni na mangkatahon: “Jadi maidop ma uhurni”, patut do age hita maruhur sisonai.
Mardilo hu pesta diri na masombuh, seng dong bahenonni balasni. Anggo mambere hita bani na boi mambalas ninuhurta, ai sedo ai holong na pitah, tapi holong na marpangkaut do.
Ham Tuhan Jesus! Paahapkon Ham ma holong-Mu in bangku. Dihut ma ahu pakei Ham pamalaskon uhur ni na marhahurangan. Amen.
Haleluya No. 134 : 1,2: Ambit Lang Ham Rupeihu, ale Jesus >>
1. Ambit lang Ham rupeihu ale Jesus,
jaha daroh-Mu manghakui ahu
mintor huja ma ahu na mardousa, marhaporusan.
2. Ai seng be dong na songon Ham Tuhanku,
na parlunggarhon pusok ni uhurhu;
Sahalak Ham do sipasonang ahu, hagoluhanku.
Ambit lang Ham rupeihu ale Jesus,
6 Agustus: Jahowa Siparmahan Au >>
<< 4 Agustus: Isarihon Naibata do Goluhmu
tnt160805
Recent Comments