9 Desember: Domma roh harajaon ni Naibata das hubagas uhurta?

tnt_des9_harajaonni naibata

Anjaha seng tarhatahon: Tonggor ma “ijon do!” atap: “ijai do!” Atap “ijjai do” Ai itongah-tongah nasiam do harajaon ni Naibata.

(Lukas 17: 21)

Harajaon ni Naibata seng mamintor tartuduhkon: Andon do, atap andan do. Ai ma seng mamintor taridah pardaratni jolma, dong ma pargolingan ni uhurni.

Humbani sapari seng ongga ipingkiri pasal Naibata, gabe mamungkah ma martonggo hubani Naibata, porsaya ma ia bani Naibata. Sapari seng ongga ipingkiri pasal dousa, sonari martonggo ma ia mansopotkon dousa. Ipindo ma hasasapanni, ipindo ma gogoh mangimbang dousa.

Sapari ihorjahon do atap aha harosuh ni uhurni, sonari sihol horjaonkonni ma harosuh ni Naibata. Anggo domma marhorja harajaon ni Naibata ibagas uhurta, sonai ma lambin dear ma parlahouta, hauhuronta pakon parsaoranta, ibagas sahap pakon pambahenanta.

Ase sungkun-sungkun na porlu banta, bamu pakon bangku: Domma roh harajaon ni Naibata das hubagas uhurta? Ipaturut hita do harajaon ni Naibata manrajai hata pakon pambahenanta! Atap ibere hita ope na jahat manrajai ibagas uhurta, taridah bani hata pakon pambahenanta.

Laho ma lobei uhurta bani na binahen ni Naibata sanggah tardidi hita, sonaha do pardomuanta pakon Naibata na dob iputuskon ijia? Lang be hita manombah atap martenger ni uhur bani na legan, bulat bani Naibata mando. Ambah ni ai bapanta ma Naibata, anak-Ni ma hita. Itongah-tonganta do harajaon ni Naibata. Tapi sedo horjanta ai, horja ni Naibata do. Anggo Naibata ma manrajai uhurta, ia ma raja ni uhurta pakon parlahouta. Jadi rayat ni Naibata ma uhurta, iakuhon hita ma Naibata, gabe rajanta.

Anggo sonai padihut hita ma diha-dihanta, tondongta, anak borunta pakon sapangankon hita, toguonta ase rap marraja hita bani Naibata. Jadi botul ma itonga-tonganta harajaon ni Naibata, itonga-tonga ni hita na mardiha-diha. Gabe sada sisombahon ma hita dompak Naibata.

Tonggo

Ham Tuhan Naibata! pungkah Ham ma harajaon-Mu ibagas uhurhu, ase sintong Ham rajangku janah ahu rayatmu. Sonai ma namin pakon ganup diha-dihangku. Amen.

Doding

Haleluya No. 38 : 1, 4 : I Betlehem do Tubuh >>
do = g; 4 ketuk

1. I Betlehem do tuhuh Anak na banta in.
Indo halak na bujur, hutodoh Rajangkin,
Indo, in do hutodoh Rajangkin

4. Botul ondoskononku Bamu ma uhurhon
Sai holong ma atei-Mu, urupi au tongtong
Nai ma, naima, urupi au tongtong.

10 Desember: Mase Manasap Dosa ni Hasoman >>

<< 8 Desember: Songon Bola ni Senter