8 Juli: Holong-Ni (Jesus) na Mangindahi jaha Pagoluhkon

“Ai na roh do Anak ni Manisia in mangindahi anjaha pagoluhkon na magou.” 

(Lukas 19:10)

Anggo ididah Tuhan Jesus sada halak tardempar humbani Naibata, mintor marontou do uhur-Ni. Ihatahon hubagas uhur ni halak ai: “Mulak ma ham bani Naibata, Huurupi pe ham ase maluah humbani dousamu”.

Tapi buei seng parduli bani hata ni Tuhan Jesus na dob roh hubagas uhurni, rahanan do ia manggoluh ibagas dousani. Sonai ma lalab, lambin roh daohni humbani Naibata. Mardalan ma ia humbani dousa na sada hubani dousa na sada nari.

Tapi Tuhan Jesus do na mangindahi tonduy na mambur merap ai. Botohan do Tuhan Jesus ase pardousa ai sandiri paboa dousa ai do pasambor angkula uhur pakon tonduy. Ihatahon bani tonduy panlanggar ai: “Sihol pamalumonku do naborit ni tonduymu, sihol paluahonku ho humbani panrahut ni dousamu, sihol boanonku do ho hu Bani Bapa, age pe domma mardousa ho”.

Tapi anggo na manendel ai sonon do sampangni: “Seng porlu bangku Sipaluah, hudalankon ma pangindoan ni uhurhu”. Age pe sonai inunut Tuhanta do mandilo hita: “Roh ma ham hu Bangku, dalanmu in dompak hamagoan do, hamagoan ni daging pakon tonduy do in. Hu urupi pe ham”.

Sonai ma sihol ni uhur ni Jesus halani holong sihol paluahkon hita, humbani dousanta. Ham do ra sada partonduy na magou ai? Domma mardomu ham pakon Tuhan Jesus? Ra domma ibagas dousa ham na piga tahun on. Tapi ulang patendel ham uhurmu, mulak ham bani Naibata na tongtong mangindahi ham. Mulak ma ham bani goluh na pansing, tundalhon ham ma dousamu. Halani holong ni atei ni Tuhan Jesus banta, motom do uhur-Ni sihol paluahkon hita.

Ulang hampung uhurta bani parontou ni uhur-Ni ai. Patidak hita ma dirinta bani Tuhanta na mangindahi hita, halani holong ni atei-Ni.

Tonggo

Ham Tuhan Jesus! Tarima kasih ma Bamu,halani holong-Mu na mangindahi janah pagoluhkon ahu. Urupi Ham ma ahu ase huarusi pangkarga-Mu bangku na magou hinan namin.

Amen.

Doding

Haleluya No. 5: 2, 3: Hupuji Holong ni Atei-Mu >>

2. Sai ipindahi Ham do ahu, Ham pe huhasiholi do.
Itogu uhurMu uhurhu halani ai hubere do:
lpilih Ham hinan tonduyhu, ai pe hupilih Ham Tuhanku.

3. Huahap maningon mar-Tuhan, ningon manggoluh au Bamu:
Seng jumpah au be hagoluhan, anggo seng pinasirsirMu:
Sai Ham na baen parsarananku, sai gok Bamu mando langkahku.