Seng hudaskon gila ni uhurhu, seng hu parseda Ephraim. Ai Naibata do Ahu sedo jolma, itongah-tongahnima do Na pansing in, seng roh ahu ibagas ringis. (Hosea 11 :9)
Terj. baru (LAI, 1976) “Seng dalankononku ringisku na gajag in, seng be parsedaonku Efraim. Ai Naibata do Ahu, sedo jolma, ai ma Na mapansing ai itongah-tongahnima, seng roh be Ahu mamboiskon“.
Bani hata na tarsurat iatas on taridah do lumbang ni uhur ni Naibata dompak hita jolma. Tarlobih dompak Ephraim (Israel), na tangkas ipaluah Naibata hun Masir, humbani parjabolonan, itogu-togu, iiring-iring, ipainu-inu, iain gabe bangsani. Hape ipio sidea roh-roh daohni, itundali, itadingkon sidea Naibata, manombah sisombahon na legan sidea.
Mase lang iparseda Naibata sidea? Ai ma lumbang ni uhur ni Naibata.
Dear tumang idingat hita lumbang uhur ni Naibata dob tarlopus hita mardousa, dong ope dalanta mulak, jaloonni do hita songon anak na magou.
Tapi ulang idingat ham lumbang ni uhur ni Naibata laho mangkorjahon dousa ham: “Lumbang do tene uhur ni Naibata age hubahen dousa on seng mahua”. Hajahaton banggal do ai na mahol sasapon ni Naibata.
Naibata na botul do Naibatanta, sedo jolma. Anggo Naibata na madear do ibahen balos ni na masambor: anggo jolma na madear do ibahen balos ni na madear tapi na jahat balos ni na jahat, tapi anggo sibolis na jahat do ibahen balos ni na madear. Halani hadirion ni Naibata seng ibalaskon na masambor binahen ni bangsani.
Sada apoh-apoh banggal ma ai bani hita pardousa on, marulak-ulakan do uhur ni Naibata. Tapi ulang hita mindat songon bajut loging, ulang hita titengon bodat (lambin huataskon). Ulang hampung uhurta halani lumbang ni uhur ni Naibata. Marbalog do age sonaha bolag ni juma. Lumbang ni uhur ni Naibata pe dong do sibarni. Ijalo Naibata do hita songon anak na magou tapi lanjar soh ma anak na magou ai rapkon bapani.
Tarima kasih ma Bamu Naibata, Bapanami, halani seng ibalaskon Ham dousangku. Lumbang do uhurmu mangidah ahu. Pujionku ma Ham. Amen.
Haleluya No. 46: 2, 4: Satahun Use Ma Surutni >>
2. Porini matei au sonari, huja ma nani tonduyhin?
Bia hasonangan holi nani rap pakon na mapansing in?
Mamuji Naibata do ahu, ibaen holong ni atei Niin
Atap na hona uhum ahu bai apuy na so miloh in
4. Dousangku seng be tarbilangi, hubahen sain dokahni in.
Na dong tarhira be layak ni Tuhanta Jesus na dob in.
Seng ibalaskon Ham, Tuhanku, hu bangku songon dousangkin.
Lumbang do uhur-Mu hu bangku paidah-idah gabeihin.
Recent Comments