“Tapi anggo ho, ihutkon ma Ahu.”
(Joh. 21:22)
Ai ma iluarhon Tuhan Jesus bani sagala na ra gabe susianni. Bani dakdanak age na magodang: -Ihutkon Ahu!”
Dong do deba na marpingkir: “Tuhan ra do ahu mangirikkon Ham, tapi sonaha do artini ai?” Aha do sibahenonku ase na mangihutkon Ham ahu hataonkon?
Sonai ma sungkunkon ham bani Tuhan Jesus sandiri, ase Ia patugahkon bamu marhitei Tonduyni sonaha arti ni na mangihutkon Tuhan Jesus. Sonon ma tonggomu: “Ham Tuhan Jesus! Patuduhkon Ham ma bangku atap sonaha ahu mangirikkon Ham arian on? Sonaha do na talup parsaoranku arian on, bani niombahku, bani namatorasku, bani tokehku, bani urangku pakon bani hasoman-hasoman.
Ra do Tuhan Jesus mangkusipkon bamu marhitei Tonduyni, sonaha na talup sibahenonmu dompak haganupan ai. Anggo laho ma ham mamungkah horjamu ari-ari i juma, i pargulaan, i kantor, i parsikolahan, i kodei pakon na legan tene, porlu iahap ham ilambungmu do Tuhan Jesus. Ididah do atap aha binahenmu, ibogei do atap aha iluarhon ham, ididah do sagala pingkiran na manggulmit ibagas uhurmu, ibotoh do isi ni uhurmu. Ijai ma tong sungkunon: Na mangirikkon Tuhan Jesus ma ahu ai? Ia roh na mahol atap na borat bamu, manungkun ma ham: Sonaha nani porini Tuhan Jesus manaron sonai, sonaha do ibahen?
Sada do na porlu ingaton, ningon humbani Tuhan Jesus do jaloon gogoh laho mangirikkon-Si, seng sungkup gogohta sandiri. Ia do mangkatahon hita mangihutkon-Si, ra do Ia mambere gogoh banta ase saud ai.
Goranta ai “Kristen” artini siihutkon Tuhan Jesus Kristus. Gati do asal margoran Kristen mando hita, seng be siirikkon Tuhan Jesus Kristus, lang be hita songon tobu atap sarpaet, “songon goranni daini.”
Tonggo
Ham Tuhan Jesus! Sihol do ahu mangihutkon Ham, tapi buei do na mangambati na hundarat pakon na humbagas uhurhu. Bere Ham ma bangku gogoh an-ari, ase boi Ham huihutkon bani goluhku ari-ari das bani ujungni, se odoran-Mu ahu das hu hasonangan pinarbagah-Mu. Amen.
Doding
Haleluya No. 107 : 1,2,7: Irikkon Nasiam ma Au >>
1. Irikkon nasiam ma Au, nai hatani Tuhanta
Sai parnalang ma dirimu, hatangku malah harga
Sai mambur bahenlah ganup, parlahoumin na so talup2. Au do palihar dalanmin, na dompak hagoluhan;
Ai seng be kahou langkahmin, daoh pakon hamagouan.
Au parhiteian na bujur, bai hasonangan na botul!
7. Marmogah-mogah hita bei, lao mangihutkon Jesus.
dagingta ‘ge tonduyta per tulakhon lah bai Jesus;
Ai na mangengkar Tuhan in, seng dapot hasonangan in.
Recent Comments