“Ise na totap ibagas Ahu jaha Ahu ibagas dirini, ai ma na ramos marbuah; ai seng tarbahen hanima age aha anggo seng rap pakon Ahu”.
(Johannes 15 :5)
Anggo seng marhasoman Tuhan Jesus, seng tarbahen hita age aha. Seng tarbahen hita mambalosi (mangidangi) Naibata anggo lang marhasoman Tuhan Jesus. Anggo seng marhitei Tuhan Jesus, seng ibotoh hita holong ni atei ni Naibata banta.
Anggo marianan Tuhan Jesus ibagas uhurta, ibere ma banta gogoh marhitei gogohni, ibere banta Tonduyni. Jadi boi ma hita marlajar sonaha mangkaholongi Naibata pakon mangkaporsayaisi, marhitei haporsayaon na toguh. Jadi marianan ma damei ibagas uhurta, gabe halak na sabar ma hita, halak na basar, na mansarihon na madear pakon na pintor.
Na ra do Tuhan Jesus marianan ibagas dirinta, anggo tong-tong hita marianan ibagas Dirini. Aha do arti ni ai marianan ibagas diri ni Jesus? Artini ulang marnaholang hita roh hu Bani martonggo (marsahap). Ai buei ari-ari na paganggang hita humbani Tuhanta. Porini manggila hita dompak hasoman, boi ma marhitei ai sirang hita humbani Tuhanta. Anggo sogam uhurta, mardomdom hita, na misir do hita ai humbani Tuhan Jesus.
Halani tong do ari-ari marsaor hita pakon dousa, porlu do ari-ari mulak hita hubani Tuhanta mangindo hasasapan ni dousanta ampa hurang ni uhurta. Pindoonta ma idop ni uhumi ase ibere banta malas ni uhur na humbani.
Anggo seng rap pakon Tuhan Jesus seng tarbahen hita harosuh ni Naibata. Dob puho ham, basai ham ma hata ni Naibata, marhitei hatani ai ibagas ham ma Tuhanta. Dob ai martonggo ma ham, ijai ma ibagas Naibata ham. Anggo sonai marbuah ma ham ari-ari.
Anggo totap hita martonggo hubani Tuhan Jesus, songon na masuk do hita hubagas Tuhan Jesus marhitei tonggonta ai. Sonai do anggo totap hita manjalo hata ni Tuhanta, masuk do hata ai hubagas uhurta, masuk do Tuhanta hubagas uhurta. Anggo sonai marbuah na ramos ma hita.
Tonggo
Ham Tuhan Jesus! Ibotoh Ham na galek do hu janah mardousa. Sai roh do parlajuoan hu bangku. Roh ma Ham hu bagas uhurhu, ase monang ahu janah marbuah na ramos.
Amen.
Doding
Haleluya No. 50: 3, 4: Sai na Margantih Tahun on >>
3. Ra ma manringis Naibata mangidah parlahouhu;
Ra ihatahon: “Roboh ma haron na so behangku;
Seng ongga ra marbuah in, benaha be marguna in!”4. Halani kinahuhon-Mu do au, ase manggoloh;
Sonon nimu bai Bapa-Mu: Paturut ma manggoloh;
Haron, holong ma atei-Mu, taun roh pe das uhum-Mu.
8 Juni: Seng dong i dunia on na songon holong ni atei ni Naibata >>
Recent Comments