“Bapa, domma mardousa ahu, seng talup be ahu goranon anakmu.”
(Lukas 15:18,19)
Hata ai ma dalan mulak bani anak na magou ai, dob idagei sitaronon na parah ai.
Hita pe anggo dong panundalionta bani Naibata patut ma usihanta uhur, hata pakon langkah ni anak na magou on: “Bapa, domma mardousa ahu dompak Ham, seng talup be ahu goranon anak-Mu!”
Ibotoh hita sandiri do na so ibalosi hita botul Naibata, seng sadiha ipingkiri hita Naibata, gatian marpingkir hita pasal dirinta. Ibotoh hita do anggo domma ganggang hita humbani Naibata, iuji hita pe mambahen na madear,lanjar do seng jumpah na madear banta.
Seda pitah dompak Naibata hita mardousa, dihut do dompak hasoman jolma, Seda pitah sahali, tapi atap piga-piga hali do.
Ididah ham do na so dong na madear ibagas dirimu, dousa pakon panlanggaron do hansa, Ai do mambahen golap goluhmu, lang dong damei ibagas uhurmu. Dobni gabe iahap ham ma irajai dousa ai ma ham, songon seng dong be partolongan.
Tapi ulang ham silap dong do partolongan bamu. Ra do Naibata mangurupi ham. Na dob ijalo do ham gabe niombah-Ni bani pandidion na pansing in, holong do tong uhur-Ni bamu.
Boi do ham roh hu Bani age sonari. Urupan-Ni do ham. Patugah ham ma hu Bani pasal dousamu ganupan, gorani ham sada-sada, patugah ham na masihol do ham gabe anak-Ni use. “Seng tarbahen ahu be ai. Ai domma banggal-banggal janah buei dousangku.”
Sintong do ai tongon. Tapi on pe sintong do: “Jesus Kristus domma matei halani dousamu.” “Sintong do homa Naibata paridop ni uhur, parontou ni uhur manasap dousanta pakon papansingkon hita humbani ganup hagedukon.”
Ulang pala ham sundat roh halani dousamu,ai banggal pe dousamu, banggalan ope idop ni uhur-Ni Naibata. Putus ni uhur laho mansopotkon dousa, ampa tenger ni uhur bani hasasapan ni dousa, ai ma na porlu bani hita pardousa on, ase dapot hita hasasapan ni dousanta humbani Naibata marhitei Tuhan Jesus na dob matei marsik bani hayu parsilang, ase maluah hita humbani dousa.
Tonggo
Ham Tuhan Naibata! Tarima kasih ma Bamu humbani gok ni uhurhu, halani idop pakon lumbang ni uhur-Mu na manjalo ahu use songon anak na magou.
Amen.
Doding
Haleluya No. 148: 1-3, 5: Layak do Ham Mambere Au >>
1. Layak do Ham mambere au , O Jesus Tuhankin,
Ihutkon Ham daoh pe au, mambuat uhurhin.
2. Pardousa na banggal do au, pansing do anggo Ham ;
Sai bai na dorsa laho au bai na jahat naman .
3. O Tuhan, husopotkon ma ganupan dousangkin ;
Holong ma Ham, sai sasap ma, Bamu ma tonduyhin.
5. Ai domma pala matei Ham, mangkopkop tonduyhin;
Sihol ma au mangidah Ham, hu lambung-Muu ijin.
Recent Comments