5 Juni: Naibata do Mardilo Hita hu Bani

“Mase ma roh Ahu ise pe lang dapot? Dilo-dilo Ahu ise pe lang marbalos? Ai mapondoktu do tangan-Ku mambahen haluahon?”

(Jesaya 50:2)

(Terjemahan baru 1976, “Mase ma, sanggah roh Ahu, ise pe lang na ijin? Dilo-dilo ahu, ise pe lang na marbalos? Ai mapondoktu do nani tanganku laho paluahkon?”)

Ipio Naibata do na madoyuk i dunia on sihol paluahon-Ni sidea humbani hadoyukonni binahen ni dousani. Tapi seng dong na mambalosi dilo-dilo ni Naibata. Buei janah banggal do dousa ni sidea. Iahap do namin dousa ai mambahen daoh ia humbani Naibata.

Ninuhurni palobei talu dousa ai ase roh ia hubani Naibata. Tapi nini Naibata: “Mase lang ibalos ho dilo-dilong-Ku?”

Ibotoh Naibata do pardousa hita sanggah idilo hita, sihol roh hita hubani Naibata sonaha pardongta, age ibagas dousa pe.

Anggo lanjar lang roh hita hubani Naibata, hatoonkon-Ni ma: “Ai mapondoktu do tangan-Ku mambahen haluahon, atap seng dong gogoh Bangku mambahen haluahon?”

Ulang lang roh hita hubani Naibata halani dousanta. Roh ma hita hubani Naibata mamboan dousanta ai, ra do Ia paluahkon hita.

Idilo Naibata do gati jolma, tapi jolma seng ra marbalos. Marosuh do Naibata anggo martuah jolma, tapi seng ra jolma porsaja bani haluahon binahen ni Naibata.

Ijon ma ididah hita suharni humbani ugama sapari. Sapari manisiani do mardilo (marpio) pahuta sisombahonni, ai hita jolma do na mamorluhon sisombahon ai.

Tapi ijon Naibata do mardilo jolma manisia ase roh hu Bani, ai harga do hita Bani, holong ateini banta, tinompani do hita.

Sonaha do uhurmu pasal ai? Seng dumpar be Naibata marpio hita, tapi ipio do hita marhitei hata-Ni, marhitei parambilan, ampa marhitei na masa banta.

Tangihon ham pio-pio ai balosi ham Naibata.

Tonggo

Ham Tuhan Naibata! Roh do hanami hu Bamu rap pakon hagalekonnami, jalo Ham ma hanami.

Amen.

Doding

Haleluya No. 108: 3, 11: Sanggah Holong Tong Tuhanta >>

3. Ia dalan hagoluhan, na sompit turnang do in.
Ulang ma ho marnasogan, tong jaga bai munsuh in.

11. Haganup na bujur uhur mangihutkon Jesus in,
Sai ilawan na masambor ronsi rotap hosahnin.