Tapi barang piga na manjalosi (Tuhan Jesus) hujai do ibere kuasa, ase gabe anak ni Naibata sidea, sagala na porsaya bani Goranni (Johannes 1 : 12)
Anggo sihol hita gabe anakni Naibata, ningon porsaya botul hita bani Tuhan Jesus. Porsaya bani Tuhan Jesus artini iakuhon uhurta Ia Sipaluah hita. Ijalo hita Ia songon sibere-bere humbani Naibata.
Domma ijalo ham, ijalo uhur mu Tuhan Jesus Sipaluah ham humbani dousamu? Anggo lape, lape ham anak ni Naibata, lang dong ope hakmu marbapa bani Naibata, lape dong bamu goluh ni Naibata.
Sonari ra do ham manjalo Jesus gabe Sipaluahmu? Anggo ijalo ham Jesus gabe Sipaluahmu, ai ma na dob matei bani hayu parsilang mangkopkop ham, ijai ma malas uhurmu, ijai ma roh habotohonmu paboa ham anak ni Naibata.
Anggo domma ibotoh hita, hita Kristen on hape nasituan pakon nasipanakboru surga do hita hape, ai ma gogoh mangimbang dousa pakon husip ni sibolis.
Na pansing tumang do Bapanta na i Nagoriatas ai, jadi anakni pakon boruni lang dear butak sahapni age parlahouni.
Itompa Naibata ma tonduy na bayu ibagas uhurmu, ase gabe jolma na baru, jolma na baru on ma na margogoh manlawan dousa.
Anggo domma iahap hita bapanta na sangkan Naibata, simada haganup na markuasa bani haganup, hinsah ma uhurta marsuhutan mansuhutkon na porlu bani Bapanta ai, gabe halak na bayak ma ham iahap ham bani Naibata. Sonang ma ham age ibagas na sunsah nini halak.
Ham Tuhan Naibata! Urupi Ham ma ahu manjalo Anakmu Tuhan Jesus Kristus Sipaluah ahu, hatahon Ham ma bani tonduyhu: na dob niombahmu ahu ase sonang ahu hun tanoh on nari das hu lambungmu i surga. Amen.
Haleluya No. 128 : 1, 4, 6: O Jesus na Pagoluh au >>
1. O Jesus na Pagoluh au, Anak ni Naibata.
Holong atei-Mu togu au, ondos bai Naibata.
4. Ibuat Ham do horungkin papuho uhurhon,
na sonang au halani in, bai hasombuhonkon.
6. Huhatengerhon hata-Mu, ai na sintong do in;
Hudingat bagah-bagah-Mu na so ubahon in.
Recent Comments