“Laho ma hanima podahi hanima ma sagala bangsa ase gabe susian-Ku”. (Mateus 28 :19)
Dong do halak na marpingkir pasal na mangarah on i Simalungun on ma lobei, halak Simalungun ma lobei, sadokah dong ope sipajuh begu-begu ijon siarahonkon.
Pingkiran ai lepak do ai. Hata ni Tuhan Jesus marsuruh susianni (Kristen) mamboan ambilan na madear bani sagala bangsa do. Ningon pungkahonta do mambahen ranggian mamboan ambilan na madear, lobei bani simbalogta, dob ai hudaratni ai use.
Tongon bani hasomanta ma lobei songon hu Serdang, Badagei pakon Padang (Sumatera Timur). Dob ai namin bani suku bangsa na legan ma songon bani halak Gayo. Ai pe ase ibalosi hita hata ni Tuhanta na iatas in. Sai iparuhuri Tuhanta ma GKPS, ase dong daerah missionni idarat ni Suku Simalungun, gendo i Indonesia on lobei. Dob ai pe ase hu darat ni Indonesia on. Ai mase hita hansa manjalo pandita hun luar negeri? Sidea domma ibalosi hata ai. Sonaha hita? Lambin iahap hita ma holi sonangni na sahorja hita pakon Tuhanta. Tapi ulang hita lolei homa mangarahkon na i lambungta. Tuhan Jesus mangkatahon: “Gabe saksingku ma hanima i Jerusalem, i Judea, i Samaria das hu tampakan ni tanoh on”. (Terjemahan baru, ” gabe saksingku ma hanima i Jerusalem ampa i sab Judea ampa i Samaria ampa das hu ujung ni tanoh on”, Lah 1: 8) Lobei i Jerusalem, dob ai nagori Judea, ai pe ase Samaria dob ai pe ase das hu tampakan ni tanoh on.
Horja mission (zending) ni GKPS nuan ai ma Serdang. Sonaha do hita domma gati ipasirpang ham tumpakmu dompak horja ni Tuhanta na Serdang ai? Bilangi ham tongkin pardalan ni duitmu, sadiha do ai ipadalan ham dompak harajaon ni Naibata? Atap dong deba ipasirpang ham dompak hagigi ni Naibata. Martanggung-jawah do hita bani Tuhanta pasal pardalan ni sinarinta. Tapi sada na torang harosuh ni Tuhanta ai ma pararatkon harajaonni bani horja mission (zending).
Ham Tuhan Naibata! Domma das bannami Ambilan na Madear pasal Tuhan Jesus Kristus Sipaluah jolma, ai ma marhitei hasoman na dob hunlobei porsaya bamu mangihutkon parentahmu. Urupi Ham ma hanami ase malas uhumami mandalankon pangarahon. Amen.
Haleluya No. 140: 1.3: Andohar Apuy-Mu ma Gara >>
1. Andohar apuy-Mu ma gara, parholong atei na sintong
Podas homa ibotoh halak, Ham Jesus, Raja na sintong
Domma tongon mamungkah siang, ikehen i huluan in;
Bahat tumang do tong na hurang ai sol lihar do ganup in.
3. Puhoi, baen pansing, pasada ganupan Kristen hu Bamu;
Sai ulang dong be age sada na so mananda holong-Mu.
Padomu Ham ma tong hanami marhitei-hitei Tonduy-Mu.
Sondangi Ham hasoman nami na so mananda goran-Mu.
Recent Comments