4 Juni: Sonaha Patut Martonggo

“Age aha pe sipindoonnima hubani Bapa in, sai bereonni do marhiteihon Goranku”.

(Johannes 16:23)

Sedo hubani simbuei ihatahon Tuhan Jesus hata ai ijia, tapi hubani susianni do, na orod Bani, na dob manjalo uhur pakon Tonduy ni Tuhan Jesus. Seng martonggo sidea songon na mamaksa, tapi martonggo do sidea songon partonggo ni Tuhan Jesus.

Ingat hita ge tonggo ni Tuhan Jesus i pohon Getsemane: “Tapi sedo uhurhu, uhurmu ma na saud”. Sonai do pasal panorangni, gok bani Naibata do panorangni laho mambalosi tonggonta.

Tarhatahon sonon do pangibulan ni tonggo ni susian ni Tuhan Jesus: “Ia berean bangku romban bani harosuh ni uhur-Mu do. Bere Ham ma bangku na mangojur ahu lambin dohor hu Bamu, ase lambin dargos uhurhu Bamu. Bere Ham bangku na boi mangidangi Ham ibagas goluhku. Uhurmu do sintuhunni, ibotoh Ham do aha na mambahen hasonangan bangku”.

Porini ibagas malas ni uhur pe mangkawah do susian in dompak babou, dompak Naibata Bapanta i nagoriatas, mardingat sagala pinindoni marhitei goran ni Tuhan Jesus, sai ibere do ai mambahen hasonangan-Ni.

Anggo martonggo hita marhitei goran ni Tuhan Jesus, lambin iajari Naibata do manangkasi Hata ni Naibata na tarsurat in. Ijai ibogei hita hata ni Naibata, ijai lambin iajari hita sonaha patut hita martonggo.

Humbani ringgas ni sahalak mangkorjahon sada horja, lambin pandei do ia mangkorjahon horja ai

Sonai do anggo lambin ringgas hita martonggo lambin ibotoh hita do martonggo. Lambin iajari Tonduy ai do hita manluarhon hata ni uhurta na romban bani uhur ni Naibata.

Tonggo

Ham Tuhan Jesus, tarima kasih ma Bamu, halani ra do Ham mamagodangkok pangindoannami hubani Bapa in, gabe siat pangindoannami marhitei goran-Mu, janah jaloonnami pinindonami marhitei goranMu.

Amen.

Doding

Haleluya No. 88 : 2-4: Haleluya! Na Puji ma >>

2. Haleluya! Na puji ma na susur humbai Naibata, in do hansa Anak-Ni.
Na matei ibaen dousa in, paturei hagoluhan in, ningon dodingkononta.

3. Haleluya! Na puji ma panondang humbai Naibata, sinuruh bai uhurta.
Pangapoh na taranjuk in, ihutan pangajari in, ningon dodingkononta.

4. Haleluya! Bai Bapa in, bai Anak ampa Tonduy in, puji-pujiannami.
Bamu ma hamogahan in, ampa hamuliaon in, ibere uhurnami.