30 Desember: Hamubahon na ihorjahon ni Naibata

tnt_des30_naibatapaubah

Ai boi do ipaubah halak Etiopia huling-hulingni atap begu jolang-jolangni? Sonai ma sabonar seng tarbahen hanima mambahen na madear, hanima na dob somal mangkorjahon na jahat.

(Jeremia 13: 23)

Halak Kus (Etiopia), seng boi ipaubah hulingkulingni na birong ai gabe lopak. Begu pe seng boi ipaubah ritouni. Sabonar seng boi ai. Ase Bibel mangkatahon halak na jahat seng boi bujur. Tongon do ai anggo humbani dirini sandiri, seng tarpaubahsi dirini sandiri.

Tongon isuruh Naibata do hita paubah uhur. Artini, maningon marbois gogoh do hita laho paubah uhurta, ningon maruntol do hita. Ijai pe ase siat pangindoanta mangindo gogoh humbani Naibata, ase ipargogohi hita paubah uhurta, dob ai pe ase saud das hita hubani hamubahon ni uhur ai. Lobei itanda dousani, isopotkon dousani, ipindo hasasapanni. Marjora-jora ma ia, ijalo ma hasasapan ni dousa. Ipindo ma gogoh mangimbang dousa. Ipindo ma uhur nabayu, na magigi mangidah dousa. Holong ma uhurni bani Naibata, sonai homa dompak hasoman jolma. Ipindo ma idop ni uhur ni Naibata, itangihon Naibata ma tonggoni, ibere Naibata ma hubani tonduy nabayu na mangkarosuhkon na madear.

Naibata do na boi paubahkon na birong gabe lopak, na jahat gabe bujur, na sambor gabe dear. Halani holong ni Naibata banta na so tarpaubah hita, ra do Naibata janah boi do ipaubah. Tapi porsaya hita janah tenger uhurta bani Naibata pasal ai. Anggo domma banta Naibata jumpah hita ma sagala na porlu bani tonduyta.

Dong do deba halak sihol patureonni ase gabe dear. Tapi ulang hita taroto, ai seng boi. Ambit na tarpaturei jolma dirini, seng pala roh Tuhan Jesus hu dunia on, pala matei mangkopkop hita.

Songon saponggol bosi rap pakon tasikni roh hu hu panopaon, ijai do ipamilas, ipagerger, dob ai itopa gabe turpa nabayu. Ijai ma mangkamambur tasikni. Ningon sonai do hita roh hubani Tuhanta patopahon dirinta. Tarehon ham age sonaha pambahen ni Naibata laho patorsa ham na so tarpakei hinan gabe boi pakeon ni Naibata.

Tonggo

Ham Tuhan Naibata, Bapanami na i Nagoriatas! Tompa Ham ma uhur pakon tonduy nabayu ibagas uhurnami, ase tarpaubah Ham hanami. Amen.

Doding

Haleluya No. 107: 3, 5. Irikkon Nasiam ma Au >>

3. Hupatuduhkon dalan in, sisimbilonkonnima,
Ganup geduk ni uhurrnin sipaubahon nima;
‘Se tong pansing ma tonduymin, ronsi rotap ni hosahmin.

5. Seng na tarbaen hanami in, ipingkir uhurnima;
Ulang mabiar halanin, Au do hasomannima.
taluhonon-Ku munsuh in, tenger uhurmu pasal in.

31 Desember: Hapintoron-Ni gabe hapintoronta >>

<< 29 Desember: Sipamahan hita, na patorsahon goluhta