3 Juni: Bagahbagah ni Tuhanta Itangihon do Tonggonta

“𝘼𝙜𝙚 𝙖𝙝𝙖 𝙥𝙚 𝙞𝙥𝙞𝙣𝙙𝙤 𝙝𝙖𝙣𝙞𝙢𝙖 𝙝𝙪𝙗𝙖𝙣𝙞 𝘽𝙖𝙥𝙖 𝙞𝙣, 𝙨𝙖𝙞 𝙗𝙚𝙧𝙚𝙤𝙣𝙣𝙞 𝙙𝙤 𝙢𝙖𝙧𝙝𝙞𝙩𝙚𝙞𝙝𝙤𝙣 𝙜𝙤𝙧𝙖𝙣-𝙆𝙪”.

(Johannes 16:23)

Ijamin Tuhan Jesus do bani susianni, sai na mangasi do, siat do tonggo ni sidea bani Bapa in marhiteihon goran-Ni. Iojur Tuhan Jesus do sidea mardingat hata on: “Pindo ma ase ibere bam”.

Sai ulang ma lupa hata ai humbanta tarlobih ibagas sitaronon pakon hasosakan.

Sasintongni seng dong na boi mangurupi hita sobali Naibata. Iahap hita do pardousa hita, janah mahol balosan ni Naibata. Tapi ia sonaha pe roh ma hita bani Naibata marhitei Tuhan Jesus. Pajojor hita ma haganup dousanta pakon pusok ni uhurta, ampa sagala haru ni uhurta pasal dirinta pakon tonduyta. Tenger ma uhurta, ra do Naibata manangihon pangindoanta marhitei Tuhan Jesus Anakni Sisada-sada ai. Songon na dob itangihon Naibata tonggo ni Tuhan Jesus ibagas jut ni uhur-Ni, sonai do tangionkon ni Naibata tonggonta marhitei goran ni Anak-Ni ai.

Ai ma patenger uhurta martonggo hubani Naibata, mardingat bagah-bagah ni Tuhan Jesus: “Atap aha pe sipindoonnima humbani Bapa in, sai na bereonni do marhitei Goranku.

Tenger ma uhurta manjolom hata ni Tuhanta ai, laho martonggo hubani Naibata. Jadi iahap hita do holi sintong ni bagah-bagah ni Tuhanta ai, gabe gok ma malas ni uhurta.
Age aha pe sipindoonta, nini, artini, sedo pitah pusok ni uhur age ibagas malas ni uhur pe maningon martugah-tugah do hita bani Naibata. Seng borat be hita marsuhutan Bani ibagas pusok ni uhur, anggo ibagas malas ni uhur pe tong do hita mangkatahon tarima kasih bani Naibata.

Tonggo

Tarima kasih ma Bamu Tuhan Jesus, halani ra do Ham marhitei goran-Mu pangindoannami bani Bapa in, ase ibere homa marhitei goran-Mu.

Amen.

Doding

Haleluya No 134:1,2  Ambit Lang Ham Rupeihu, ale Jesus >>

1. Ambit lang Ham rupeihu ale Jesus,
jaha daroh-Mu manghakui ahu
mintor huja ma ahu na mardousa, marhaporusan.

2. Ai seng be dong na songon Ham Tuhanku,
na parlunggarhon pusok ni uhurhu;
Sahalak Ham do sipasonang ahu, hagoluhanku.