Iporsan do dousanta ibagas angkula-Ni hubani hayu ai, ase matei hita pasal dousa gabe manggoluh bani hapintoran. Pangkorhon ni ugah-Ni do gabe malum nasiam. (1 Petrus 2: 24)
Ningon ihaporsayai uhurta do sedo halani hasalahan ni Tuhan Jesus ase iparsilangkon Ia, tapi halani dousa ni hita jolma do, halani dousanta do, halani dousangku do, ase boi gabe pintor hita pardousa on.
Ai boi do pintor jolma pardousa ?
Anggo boi do salih kopi pait gabe kopi manis halani saor pakon gula, hita pardousa pe boi do gabe parpintor halani ihaporsayai hita hapintoron na binahen ni Tuhan Jesus dihut gabe hapintoranta.
Sihol ma manggoluh hita ibagas hapintoron ai, salih ma hita gabe parpintor, gabe biak na pintor ma hita. Jadi matei ma hita pasal dousa.
Na matei seng boi be ihorjahon age aha. Anggo matei pasal dousa seng be boi hita mangkorjahon dousa, seng boi be hita mardousa. Ai (anggo) laho mangkorjahon dousa hita, mintor idingat hita ma sitaronon ni Tuhanta laho manggalar utang dousanta, ijai sundat ma hita mardousa.
Hamarsikon sitaronon-Ni ai ma pamalum uhurta, ai ma pasonang uhurta. Ai do homa gogohta mangimbang dousanta. Tuhan Jesus do satimbang badanta, gantihta.
Tarima kasih ma bamu Tuhan Jesus, ibere Ham hapintoronmu bannami dob isaloseihon Ham dousanami marhitei sitarononmu pakon parmateimu. Patotap Ham haporsayaonnami manjolom pangkopkopmu ari-ari. Amen.
Haleluya No. 3 :1, 2. Sai Puji Naibata >>
1. Sai Puji Naibata ai holong tong atei-Ni
Malayak tong homa bai ganup tinompa-Ni.
Megah ma hita on, mamuji Naibata.
Ai sasap dousa on, ibahen Naibata
2. Tuhanta Naibata marsuruh Jesus Kristus.
Jadi harga tumang do hita on itobus.
Iporsan Jesus in dousanta in ganup
Ase daroh-Ni in papansing haganup.
Recent Comments