29 Mei: Manonggohon Hasoman

“Nasiam saninangiku, tonggohon nasiam ma hanami”.

(1 Tesalonika 5: 25)

Buei do na sihol ase itonggohon na legan in. Gati do ibogei hita hata pangindoan sonon: “Tonggohon nasiam ma hanami!” Iahapkon roh do pasu-pasu marhitei tonggo na marsiholang. Songon namatoras na mantonggohon niombak ni bani ianan na daoh atap i pardalanan barang sanggah boritan.

Apostel Paulus ma sada na mangahapkon porlu ni tonggo ni hasoman, ai do ase ipindouhon bani Kuria Tessalonika ase itonggohon sidea ia pakon hasomanni.

Ra do iahap ham itonggohon gamot ni kuria ham (pandita, guru, sintua pnl.), itonggohon namatorasmu ham, itonggohon niombahmu ham. Tarima kasih ma uhurta bani Naibata halani dong na mangurupi mantonggohon hita.

Dong do deba seng dong iahap na mantonggohonsi. Tapi ulang sonai uhurta. Buei do na mantonggohon hita. Bani ari Minggu ibagas tonggo na pansing na pinodahkon ni Tuhan Jesus (Tonggo Ham Bapanami). Itonggohon na marribu-ribu in do ham ibagas hata “hanami”. Bani surat jinalonta pe gati do ipindouhon hasoman: “Ingat ham mantonggohon hanami!”

Anggo das hata sisonai banta atap hata ni naboritan pe, ulang hampung uhurta, ai ma pangindoan na so patut tulakon. Tapi gati lupa halak ijai, songon sahap hasomalan mando hata ai. Tapi utangta do ai. Barang ise na mangindo ase tonggohon hita ia, patut do isuhuni hita. Ia lang pe manuntuni ia sandiri tonggoonkonta, dear ma isolotkon hita ai bani pangindoanta hubani Tuhanta. Porini pe lang humbani bulat ni uhurni mangindouhon ai, ai tanggung-jawabni ma ai, tapi hita ingatonta janah balosanta do pangindoan sisonai ai.

Hunjon taridah na porlu do hita mantonggohon gamot-gamot ni kuria, Majelis Gereja das hu Pimpinan Pusat, sonai haganup panditanta, ase ipargogohi janah iurupi Naibata sidea mahorja ibagas kuriani, ase lambin marsangap Naibata marhiteihon kuriani in.

Tonggo

Ham Tuhan Jesus! Pahoi Ham ma bannami uhur na mantonggohon hasomannami, ai sonai do homa ipodahkon Ham.

Amen.

Doding

Haleluya No. 8 : 1,4,5: O Jesus Hasomani >>

1. O Jesus hasomani hanami haganup
Pasada uhur nami, ase torang ganup

4. Songon hasomannami, urupi hanai on:
Bai hasosakannami, na i dunia on.

5. Parorot Ham hanami, na dob jabolon-Mu
Ampa hasomannami, sai ondos ma Bamu.