Tapi on ma arti ni limbaga ai; ia bonih ai Hata ni Naibata do.
(Lukas 8:11)
Tuhan Jesus do panabur ai. Bonih hata ni Naibata atap hata ni Tuhan Jesus do. On ma deba porini: “Ai sonon do parholong ni atei ni Naibata bani dunia on, pala do Anakni sisada-sada ai iberehon ase ulang magou sagala na porsaya Bani, tapi ase dapotan hagoluhan na sadokah ni dokahni” (Joh. 3 :16), atap on: “Paubah nasiam ma uhur nasiam janah haporsayai ma ambilan na madear!” (Mark. 1 : 15).
Ipamasuk Tuhan Jesus ma hata ai hubagas uhurta, ase boi hita gabe anak ni Naibata. Tapi botoh ham ma dong do na so marosuh anggo gabe anak ni Naibata ham, ai ma sibolis ai. Iojur-ojur do ase marosuh hita bani dousa ampa manundalhon Naibata. Ai do ase sai iuji sibolis ai tong mambuat Hata ni Naibata humbagas uhurta, gabe lang be ipingkirhon hita sonaha Hata ni Naibata banta.
Ai lang gati do iahap hita ai? Dob ibogei hita hata ni Naibata i parmingguan atap ipartonggoan, barang ibasa hita i rumahta, seng longkot hata ai ibagas uhurta, seng nadingat be, domma magou. Ningon naahap do pasu-pasu ni Hata ni Naibata na banta ai. Tapi gati tumang do magou hata humbagas uhurta, seng longkot, seng saud marurat, gabe lang marhorja hata ai manogu uhurta pakon manopa uhurta, domma ibuat sibolis bonih ai.
Martonggo ma hita hubani Naihata, ase ipasiat hata-Ni ai hubagas uhurta janah longkot ijai. Sonai ma bahenonta laho mambasa hata ni Naibata atap laho mambogei hata ni Naibata i gareja atap i partonggoan age i rumah-rumah pe. Pindoonta ma Tonduy na Pansing ai mambahen mardai hata ai banta, anggo sonai gabe pasu-pasu ma ganup hata ni Naibata binogeita.
Anggo iahap ham iojur Hata ai ham paubah uhurmu, na dob mamungkah marhorja do Hata ai bamu. Sai tubuh ma bonih ai ibagas uhurmu, laho manopa ham.
Tonggo
Ham Tuhan Jesus! Suruh Ham ma hu bangku Tonduymu, ase hatamu, bonih na madear ai tubuh janah lambin banggal ibagas diringku.
Amen.
Doding
Haleluya No. 18: 1. HataMu, ale Tuhanku >>
Haleluya No. 18: 1.
1. Hata-Mu ale Tuhanku, arta siharganan ai
Sai palongkot bai uhurhu, ulang lang hujolom ai
Anggo seng be sijoloman Hata na madear ai
aha ma na baen onjolanni haporsayaonkin
Recent Comments