28 Mei: Arti Parnaikni Tuhan Jesus

tntmei28_lukas24_51kenaikan

“Jadi sanggah na mamasu-masu in Ia (Jesus), sirang ma Ia humbani sidea (naik hu nagoriatas)”.

(Lukas 24:51)

Domma tarangkat Tuhan Jesus hu nagoriatas, janah hundul i siamun ni Naibata Bapa. Domma ipasalosei horja-Ni ibagas harajaon ni Naibata sadokan i tanoh on Ia, ai ma paluahon jolma humbani dousani pakon humbani sibolis.

Domma ibere sabagian horja ai bani susianni. Sidea ma marambilan ase itanda halak dousani, ase roh sidea bani Tuhan sisasap dousa, Tuhan Jesus Kristus. Tapi dihut do Ia marhorja rap pakon sidea marhitei Tonduy-Ni ampa hata-Ni.

Anggo ibuha hita gelah uhurta hamasukan ni Hata ai, itogu Hata ai do hita ase masihol bani ianan na dob pinasirsir ni Naibata i nagoriatas.

Pangalaman ni na porsaya do on: Sai ihasomani Naibata do hita janah bani sada panorang iahap hita pardousa do hita. Dob isopotkon hita dousanta, mintor tenger do homa uhurta na dob isasap Naibata dousanta. Halani daroh ni Tuhan Jesus hasasapan ni dousanta, ase gabe pintor hita pardousa hinan ilobei ni Naibata.

Ai lang idop ni uhur ni Naibata do ase talup hita na ihasomani Naibata do hita bani pusok ni uhurta age bani malas ni uhurta. Gogoh na humbani Naibata do ase margogoh hita mangimbang dousa, pakon parlajoan ibagas goluhta ari-ari. Ipakei do gogoh-Ni paluah hita humbani dousanta.

Halani ai hu Bani ma gelah hita mangkawah. Seng ra Ia manadingkon hita. Bobaon-Ni do hita bani ianan na iatas ai. Ijai ma Ia mamarentah ibagas hamuliaon.

Tonggo

Ham Tuhan Jesus! Domma naik Ham hu nagoriatas. Domma hundul Ham i siamun ni Bapa in. Tapi donor do Ham tong itongah-tongahnami laho mangurupi hanami.

Amen.

Doding

Haleluya No. 78 : 1,2,5: Tarik Gomos Bamu Darngos >>

1. Tarik gomos bamu darngos pasihol uhur nami.
Hu surga in, ianan-Mu, o Jesus Tuhannami.

2. Togu tongtong hanai Bamu, bai dalan-Mu hu surga.
Anggo seng in baloson-Mu, sai saud do au maseda.

5. Tarik gomos Bamu darngos au hu nagori atas.
Ase ijin pujionkin parlayak-Mu o Jesus.

tnt160528