26 Nopember: Manonggohon Hasoman

tnt_nop26_tonggo_pindopindohansa_2.jpg

Ai pe on do sipaingathu parlobei humbani haganup. Sihol ma dalanhononkon pangindoan, partonggoon, pangapition ampa hatarimakasihon manghophop haganup jolma.

(1 Timoteus 2 : 1)

Ipalumba hata ni Naibata do hita mantonggohon haganup halak. Ai ma ase bani ari ni Tuhan in (ari Minggu) dong do tonggo na ganjang bani Agenda mantonggohon pagori kuria ampa na legan bani Naibata. Dong do deba halak Kristen na marminggu in, seng dihut uhurni bani tonggo riap na ganjang sisonai ai. Dong do deba halak Kristen na dihut marminggu ai seng iihutkon uhurni tonggo ai. Ibagas tonggo ai sedo mamingkirhon sabagian hansa humbani pagori ni Kuria in, haganupan do tene. Bani tonggo sisonai ma porlu bolag holongta.

Porlu homa pindoon uhur nabayu, na sai mangkaholongi na legan, tarlobih na ibagas sitaronon. Hita na dob somal dihut martonggo bani partonggoon sisonai ai, ra ma homa hita martonggohon age i rumahta, marosuh do Naibata bani tonggo sisonai ai. Ibagas tonggo sisonai ai ma hita mangkatahon tarima kasih, mardingat panangihon ni Naibata bani tonggonta halani holongNi.

Buei do halak Kristen na martonggo, Kristen na pindo-pindo hansa, lang ongga iahap binere ni Naibata hu bani. Mangindo do tong ibagas tonggoni marompot, tapi seng ongga atap seng piga hali mangkatahon tarima kasih.

Hubahen ma tiruan: Ipindo hita do ase ihorasi Naibata hita ibagas saborngin, anggo jorgit do hita puho, ai lang na ibalosi Naibata do pangindoanta ai? Mase lang mangkatahon tarima kasih hita dob puho pasal ai? Na janginni: Iparsahapkon Naibata marhitei na mubit-mubit hansa bibirni (suali), hape seng marsahap uhurni. Tonggo sisonai ai, seng ibotoh janah seng idingat aha ipindouhon humbani Naibata.

Tonggo

Ham Tuhan Naibata, Bapanami! Tarima kasih ma Bamu halani dear do uhurMu dihut hanami na songon siholang mantonggohon hasomannami. Pabolag Ham ma holongku na boi irambang tonggongku. Amen.

Doding

Haleluya No. 8: 1, 4, 5: O Jesus Hasomani >>

1. O Jesus hasomani hanami haganup
Pasada uhur nami, ase torang ganup

4. Songon hasomannami, urupi hanai on:
Bai hasosakannami, na i dunia on.

5. Parorot Ham hanami, na dob jabolon-Mu
Ampa hasomannami, sai ondos ma Bamu.

27 Nopember: Uhur ni na mambere ai do itorih Naibata >>

<< 25 Nopember: “Sirang humbani hajahaton”