26 Februari: Parlajouan & Harosuh ni Naibata

Iramotkon Naibata ma ham Tuhan, ulang ma masa ai Bamu!

(Matius 16:22)

(Terjemahan baru, 1976, (“Jadi iarahkon si Petrus ma Ia, ihata ma Ia, nini ma): ‘Idop ma uhur ni Naibata Bamu, Tuhan! Ulang ma masa ai Bamu’”!)

Tuhan Jesus na mandalankon sura-sura ni Naibata, roh do parlajoan hu Bani. Sedo humbani halak manorbang, tapi humbani susianni sandiri do. Tangkas do tarahap pakon tarbogei na roh humbani holongni do, songon na mangapiti Tuhan Jesus. Ai dob ipatugah Tuhan Jesus sitarononni, nini si Petrus ma: “Iramoti Naibata ma Ham Tuhan, ulang ma masa ai Bamu“.

Tapi halani rapat Tuhan Jesus pakon Naibata, iahap do atap hunja roh pingkiran ai, anggo manlanglangi sura-sura ni Naibata ma sai na humbani sibolis do ai roh. Age pe susian na hinaholongan-Ni janah na mangkaholongisi manluarhon, mintor ibotoh do sibolis do na mambahen parlajoan ai hu Bani marhiteihon si Petrus, ai ma ase mintor ihatahon dompak si Petrus: “Laho ma ho ne, bolis! Ai partolsuan do ho Bangku, ai seng na porlu bani Naibata iuhurhon ho, tapi na porlu bani jolma do” (Mat. 16:23).

Gati do homa roh parlajoan banta. Na porlu banta, gendo iahap hita parlajoan ai, sonaha pe alusni. Ai on do arihan. Laho pasaud harosuh ni Naibata do hita ai atap harosuh ni jolma. Anggo na pasaud harosuh ni jolma do hansa, seng mardomu bani harosuh ni Naibata, parlajoan ma ai, silawanon ma ai.

Tuhan Jesus seng maralang-alang, dompak susian haholongan ni uhur-Ni in (Petrus) ihatahon sibolis. Halani sagala pingkiran na manundati harosuh ni Naibata, humbani sibolis ai.

Pindoonta ma hubani Tuhanta, ase ipalihar uhurta janah ipapandei hita mangidah pakon mangimbang sagala parlajoan, ia sonaha pe rumang ni parlajoan ai. Ibere Tuhanta ma banta gogoh marnalang diri halani mandalankon harosuh ni Naibata, songon na taridah bani Tuhan Jesus.

Tonggo

Ham Tuhan Jesus! Hasomani Ham ma hanami tongtong, ase itanda hanami janah boi iimbang hanami parlajoan na roh bannami sonaha pe alusni.

Amen.

Doding

Haleluya No. 93 : 2.3. Seng Hapalang be Megahku >>
2. Sahei ma ganup utangku ibaen na tardidi au:
Uhum seng habiaranku ikahui Jesus au.
Ai daroh-Ni huparidi sanggah masuk au tardidi.
Jadi malas uhurhin sadokah-dokahni in.

3. Bolis, tangar ma hatangku: domma tardidi au.
Ningon ho taluhononku anggo ujionmu au.
Seng be dong ahamu bangku Jesus do ompungni au.
Jadi malas uhurhin sadokah-dokahni in.

Haleluya No. 93 : 2.3. 

27 Februari: “Naibatangku seng parduli bani parkarangku” >>

<< 25 Februari: Dihut do hape sitaronon idop ni uhur ni Naibata