25 Agustus: “Ai Bamu do Hata Hagoluhan”

TTor hubani ise ma laho hanami Tuhan? Ai bamu do hata hagoluhan na sadokah ni dokahni”. (Johanes 6: 68)

In ma balos ni si Petrus bani sungkun-sungkun ni Tuhan Jesus: “Naha atap na dihut do nani hanima sihol misir?” Ipingkir do seng dong na boi mambere bani songon pambere ni Kristus bani. Ibere do panandaon bani hasasapan ni dousa. Ibere do damei, ibagas diri ni Jesus mardamei ia pakon Naibata, ibere parsaranan bani uhurni na sunsah, na mais-ais. Anggo misir ia humbani Jesus, magou ma ai haganupan.

Sada pe seng dong na songon pambere ni Jesus ibagas goluhni. Paima jumpahsi Jesus seng dong sonai malas ni uhurni, sonai i jabu age bani pardiha-dihaon pe, ibagas parkawanon age ibagas horja pe. Ai ma na marubah dob rap kon Jesus ia. Roh ma damei pakon malas ni uhur na totap.

Rapkon Jesus do jumpah uhur pakon pingkiran na borsih, sihol na borsih pakon goluh na borsih. Ai masuk do Kristus hubagas uhurta, ipatorang do hubanta holong ni atei ni Naibata banta.

Ipatugah banta, na malas do uhur ni Naibata manjalo hita. Naidah do Tuhan Jesus na songon Anak ni biri-biri ni Naibata na mamorsan dousa ni hajolmaon. Marhitei haporsayaon bani Jesus mardamei ma tonduyta. Megah janah marmalas ni uhur ma hita halani holong ni atei ni Naibata mangidah hita, ipasu-pasu ma hita.

Ija do tarbahen hita manadingkon Tuhan Jesus na dob pabayak goluhta. Ija ma tarbahen hita mulak bani haru ni uhur sapari ai. Lang tene, seng dong hita na ra misir manadingkon Tuhan Jesus. Bani Kristus do hansa dong hata hagoluhan na sadokah ni dokahni. Manggoluh Bani ma hita. Matei Bani ma hita. Mangoluh atap matei pe hita, gok Bani ma hita.

Ham Tonduy ni Naibata na manggoluh in, Togu Ham ma ahu rapat bani Tuhan Jesus, urupi Ham ma ahu ase tongtong orod ahu bani Tuhan Jesus ibagas pardalanan ni goluhku ari-ari. Amen.

Haleluya No. 78:1, 2, 5: Tarik Gomos Bamu Darngos >>

1. Tarik gomos bamu darngos pasihol uhur nami.
Hu surga in, ianan-Mu, o Jesus Tuhannami.
2. Togu tongtong hanai Bamu, bai dalan-Mu hu surga.
Anggo seng in baloson-Mu, sai saud do au maseda.
5. Tarik gomos Bamu darngos au hu nagori atas.
Ase ijin pujionkin parlayak-Mu o Jesus.

26 Agustus: Paujungonni Jahowa do Horjani Ibagas Dirinta >>

<< 24 Agustus: Seng Ipaksa Yesus Hita >>

tnt0825