24 Mei: “Pindo hanima ma, sai bereonni bennima”

tntmei24_mat7_7

“Pindo hanima ma, sai bereonni do hu bennima”.

(Mateus 7: 7)

Pindo hanima ma, sai bereonni do hu bennima“. (Terjemahan baru, “Pindo hanima ma, sai na bereonNi do bannima“).

Ai ma sada hata bagah-bagah iluarhon Tuhan Jesus bani ambilan na i dolog.

Huja do hita mangindo nidokni Naibata do, ai ma sitompa langit pakon tanoh on, manotapkon partibal ni ganupan na tinompa. Ia do na boi mangurupi hita. Roh hita hu Bani lang be ibagas biar, tapi songon dakdanak ma roh bani orangtuani (bapani, inangni) padaskon pingkiranni pakon pangindoanni.

Domma iahap ham sonai pardomuanmu pakon Naibata? Porlu do pangahap ai, ase lambas uhurmu patugahkon isi ni uhurmu bani Bapanta na i nagoriatas ai. Mansahapkon malas pakon pusok ni uhurmu. Pindo ham ma Humbani atap aha na porlu bamu. Naibata na manatap humbabou janah ididah ganup anak ni manisia, ham pe ididah do homa. Ibotoh do aha na porlu bamu, bani angkula pakon tonduymu. Holong do uhurni bamu songon bapa dompak niombahni.

Tapi martorap mahol tumang do hita roh bani Naibata ampa marsahap pakon Naibata. Borgoh uhurta, iahap hita lang dong be partolongan humbani Naibata sipaimaon.

Aha do halani ase masa sonai?

Halani seng somal hita humbani na dob in mansahapkon na porlu-porlu hubani Naibata. Parugamaonta, songon hasomalan atap songon adat mando. Ihatahon halak homa ugama bibir mando (suali).

Ibagas na sonai ai pe roh ma hita hubani Naibata mangkatahon: Ham Naibata! Na boritan do tonduyhu, tambari Ham ma ahu. Suruh Ham ma Tonduymu, tonduy partonggoon hu bangku! Iahap ham do holi parubahanni.

Tonggo

Ham Tuhan Naibata, Bapanami! Halani dear do uhurMu roh hanami dumpar hu Bamu marhitei tonggonami. Pujionnami ma Ham.

Amen.

Doding

Haleluya No. 108: 1,3,6: Sanggah Holong Tong Tuhanta >>

1. Sanggah holong tong Tuhanta, na mangidah hita on
Imbang hita ma dirinta tanda jora hita on.

3. Ia dalan hagoluhan, na sompit turnang do in.
Ulang ma ho marnasogan, tong jaga bai munsuh in.

6. Sai martonggo ulang holang, ase tambah gogohmin,
Janah sai tongtong ho sirang humbai ganup munsuhmin.