Mase soh tumang nasiam sayur-sayur sadari on?
(Mateus 20: 6)
(Terjemahan baru, 1976, “Mase ma sohsoh tumang nasiam layur sadari on”?)
Anggo roh sungkun-sungkun sisonai ai hu banta, sonaha do balosta?
Seng boi ninuhurhu sonon balosta: Seng dong na mangarahkon hanami marhorja, songon na bani barita on. Ai sanggah tardidi hita, ai ma bonani iarahkon Naibata hita hubani Harajaonni. Dob lambin banggal haporsayaonta iarahkon do hita songon susianni: “Gabe saksingku ma hanima i Jerusalem i Judea pakon Samaria das hu tampakan ni tanoh on“.
Bani na dob marugama pakon na so marugama iarahkon bani Harajaonni. Gati do lupa halak Kristen bani hata ai. Gati do soh tumang hita sayur-sayur arian, seng taringat hita pasal Harajaon ni Naibata, horjanta pasal Ambilan na adear, sip-sip soh-soh hansa hita. lkawahkon Tuhan Jesus do hita ari-ari, atap na marhorja hita atap na soh-soh sayur-sayur ari.
Hu banta pe isahapkon Tuhanta do: “Mase soh tumang nasiam sayur-sayur sadari on?” Isungkunkon do ai hu banta anggo lang ilawan hita hajahaton, anggo songon na lupa hita bani Naibata.
Anggo sihol ham roh bani Naibata, botoh ham ma, tong do ham ipaima-ima, ase jaloon-Ni ham sadari on, sihol uhur-Ni pahorjahon ham bani pohon anggur-Ni ibagas Harajaonni.
Isungkun do homa hita, age lape lupa hita bani Naibata tapi lang be harosuh ni Naibata uhurta ampa parlahouta. Songon na soh haporsayaonta, lambin buei ma pingkiran na hurang dear roh hu bagas uhurta. Anggo soh haporsayaonta, ulang iagan hita na soh hansa ai, na songon na marlanguy do hita mansuharhon bah banggal. Anggo soh hita, lang markayuh, sedo hita soh tumang, tapi mayup do hita, sonai do haporsayaon ai.
Bani sisonai ai pe isungkunkon Tuhanta do: Mase soh hanima? Marhorja ma hanima ase lambin margogoh.
Tonggo
Ham Tuhan Jesus! Tarima kasih banggal ma Bamu, ai age pe pardousa hanami, ipalar ham do use marhorja hanami i pohon anggur-Mu.
Amen.
Doding
Haleluya No. 144 : 3, 4. Bolag Ope na Golap In >>
Haleluya No. 144 : 3, 4.
3. Torang do bagah-bagah ni
Bapanta i nagori atas in .
Ganupan jolma iarahkon do hubani
sonang ni uhur-Ni lo.
4. Sai gogoh bei pasaudkon
in mamboan Hata hagoluhan in .
Bai ganup bangsa na i tanoh on,
porlu baen hita horja in tongtong .
Recent Comments