20 Oktober: Pintor Halani Ipintori

“Hupatibal do i sion sada batu partolsuan anjaha batu parsangsian, atap ise na pajongjong haporsajaonni iatasni seng tarbador”.

(Roma 9: 33)

Na mambahen Kristus onjolan ni haporsajaonni seng tarbador. Pintor ma ia ilobei ni Naibata halani haporsayaonni ai.

Halongangan do hasintongan on bani sagala na porsaya, age bangsa aha pe ia, age pe hiri atap sangap ia ididah dunia on. Sipaluah do Kristus ai bani sagala na roh bani Naibata marhiteihonsi. Ingat hita ma hata on: Seng dong goran na legan ibere Naibata hiteita hu hagoluhan, sobali goran Jesus. Ai ibagas diri ni Jesus dong hagoluhan. Tapi ibagas diri ni sagala sibobahon ugama i dunia on, seng dong hagoluhan (seng dong goluh). Seng dong hagoluhan ibagas masam-masam podah i dunia on, songon philosopie, evolusi, atap hapentaran aha pe.

Halani ai dua do hansa pilihonmu Kristus atap dalan na legan. Botoh ham ma: Domma, matei Kristus halani dousanta, domma puho ia bahen hapintoranta. Sonai do haporsayaonmu ibagas goluhmu? Atap ipangunsagahon ham do horjamu, hapintoronmu sandiri? Botoh ham ma aha pe lang arti ni horjamu pakon hapintoron diri sandirimu anggo ilobei ni Naibata.

Halani ai pahibul ham janah pabulat ham ma haposayaonmu bani Jesus. Kristus batu parsuhi ai, age pe batu partolsuan janah batu parsangsian bani dunia on. Tapi banta batu onjolan ni haporsayaonta do Ia do manggalar utang dousanta marhitei sitaronon pakon parmatei-Ni mangkopkop hita.

Ai ma hasurungan ni haporsayaonta marimbang haporsayaon ni parugama na legan. Sedo hita managang hapintoranta ilobei ni Naibata, sedo hita mambahen parombouta (jasanta), domma iombouhon Tuhan Jesus Kristus ai. Halani holong ni atei ni Naibata banta, itagang do hasasapan ni dousanta, itagang homa hapintoronta marhitei Tuhan Jesus Kristus na matei mangkopkop hita.

Tonggo

Ham Tuhan Naibata! Aha pe seng dong sipangunsagaonkonnami ilobeimu, juak-juak na so margagan do hanami haganupan. Tarima kasih ma halani Jesus Kristus na sinuruh-Mu. Urupi Ham ma ahu mangkaporsayai-Si. Amen.

Doding

Haleluya No. 119: 1, 2: Bintang Pambobai >>

1. Bintang Pambobai Batu Gingging in
Tungkot sijolomon bai na landit in
Ruti hagoluhan bah na torsuk in
Alat situjuan in ma Jesus in.
Alat situjuan in ma Jesus in.

2. Ham tongon gogohku, pangajamankin,
damei ni uhur-Mu, hasonangankin
Goluh ni tonduyhu, hatuahonkin,
in ma alo Tuhan; Ham tumang do in.
in ma alo Tuhan; Ham tumang do in.

21 Oktober: Na dob lupa do nani Naibata bangku? >>

<< 19 Oktober: Tapi na so tarbahen jolma ai tarbahen Naibata do