“Gabe idilo tunanni ai ma ia, nini ma dompaksi; Ale ho juak-juak na jahat! Hublihon do haganup utangmu, halani ielek-elek do ahu”.
(Mateus 18:32)
Domma isasap Naibata ganup utangta, halani ielek-elek hita Ia, domma isasap panlanggaronta.
Mase? Halani idop ni uhur-Ni pakon holongni atei-Ni banta. Ijalo do hita tong anggo roh hita hu Bani mangindo ampun pakon hasasapan ni dousa.
Sonai ma holong-Ni banta.
Sonaha do patut holongta Bani?
On do ipindo Naibata: Sonai ma holong-Ni banta, ipindo do ase sonai homa holongta bani hasomanta jolma. Ningon humbani banggal ni uhurta bani parholong ni atei ni Naibata manasap dousanta, manjuljul hita, maridop ni uhur dompak samah hita jolma.
Bani hata na tarsurat i atas in taridah, age pe mangindo idop ni uhur jolma, marpulo-pulo do pinindoni ai. Hubani sandiri dear ma roh idop ni uhur ni Naibata, tapi bani na legan lang pala. Seng ra ia parhitean ni idop ni uhur ai, seng ra maridop ni uhur dompak hasomanni jolma.
Juak-juak na jahat do hita haganupan na patut uhumon ni Naibata.
Mase lang ra hita marholong ni uhur bani hasomanta?
Halani juak-juak na jahat hita, ai do. Ipindo hita do holong ni atei ni Naibata banta, tapi seng ra hita marholong dompak hasomanta, patidakkon na dob ihaholongi Naibata hita.
Juak-juak na jahat do hita na mambotoh mangindo pakon manjalo holong ni atei ni Naibata, tapi seng ra mambere holong ai deba bani hasoman jolma.
Pindoonta ma bani Naibata, ase holong-Ni ai mantaluhon uhur na hurang ai, ase monang holong-Ni ai ibagas uhurta.
Sedo pitah ai, holong-Ni ai boi mamboan hita hu hagoluhan na sadokah ni dokahni.
Hita na dob manjalo idop pakon holong ni uhur ni Naibata, ningon mangahadap janah mambotoh maridop ni uhur bani hasomanta, ase juak-juak na madear hita.
Tonggo
Ham Tuhan Naibata! Ibotoh Ham do maholni bannami pardousa on, manasap salah ni hasoman dompak hanami. Urupi Ham ma hanami mantaluhon uhurnami na hurang ai. Amen.
Doding
Haleluya No. 183: 1, 4: Ari na so Maringgan in >>
1. Ari na so maringgan in sai songon longgur sorani
aloling nin hubangku.
Songon tiniham uhurhin bai podang na dob marot in
huja ma ahu laho?
Sai hitir-hitir uhurhin anggo hupingkir parrohmin.4. O Naibata, pintor do Ham, parjahat in idabuh Ham
Bai apuy na so miloh.
Pondok do pardousaon in, hapeni anggo uhum in,
Lanjar do in mangodoh;
O jolma, ingat in tongtong sadokah na manggoluh ho.
Recent Comments