20 Juli: “Seng Dong Sibahen na Madear”

“Seng dong sibahen na madear sada pe lang.”

(Psalm 14: 3)

Bani Psalm ni si Daud bani bindu 14 in ibasa hita: “Na manatap do Naibata hun nagoriatas dompak anak manisia, atap dong do na mandabu-dabu, na mangindahi Naibata”. Aha do ididah Naibata? “Haganup do sidea kahou, haganup do sidea seng margagan, seng dong sibahen na madear, sada pe lang”.

Ongga do ipingkiri ham pasal hata on: “Seng dong si bahen na madear sada pe lang”. “Haganup jolma domma maseda, domma sambor”.

Domma iahap ham na dihut ma ham sada ibagas ai? Domma sambor uhurmu? Seng boi be mambahen na madear? Domma manggoluh ibagas dousa, seng be dong mangkawah dompak Naibata?

Atap seng iarusi ham hata ai. Atap iahap ham na dear pe ham ninuhurmu songon halak na legan na dear. Ra do lang iahap ham, atap dalan ni goluhmu dear pe tong ninuhurmu hape domma dalan na jahat, janah uhurmu domma igoki dousa.

Tapi Naibata na pansing ai na mangidah torus das hubagas uhurmu. Ia ma na marsahap ai hu bamu, ibotoh do na mardalan dompak hamagoan ham. Holong do uhur ni Naibata bamu, sihol toguon-Ni ham bani dalan pardamean, ase mandarat humbani dousamu.

Sonaha uhurmu? Ra do ham mangungkab uhurmu dompak hata ni Naibata? Atap seng ipaniuli ham?

Pindo ham ma Tonduy na Pansing, ase iajari ham mananda dirimu. Ra do Ia roh hu bamu patidak dousamu pakon hapintoron sandirimu, anjaha ai, sedo na asi ai. Ipatidak Tonduy ai do hapintoron ni Jesus Kristus na paluahkon hita na porsaya. Ipatidak do bamu na maidop do uhur ni Naibata bamu na martonggo hu Bani.

Tonggo

Ham Tuhan Naibata! Paahapkon Ham ma hu bannami idop ni uhurmu bani sagala na roh hu Bamu.

Amen.

Doding

Haleluya No. 148 :1 – 3: Layak do Ham Mambere Au >>

1. Layak do Ham mambere au , O Jesus Tuhankin,
Ihutkon Ham daoh pe au, mambuat uhurhin.

2. Pardousa na banggal do au, pansing do anggo Ham;
Sai bai na dorsa laho au bai na jahat naman .

3. O Tuhan, husopotkon ma ganupan dousangkin;
Holong ma Ham, sai sasap ma, Bamu ma tonduyhin.