19 Oktober: Tapi na so tarbahen jolma ai tarbahen Naibata do

“Seng tarbahen manisia, tapi tarbahen Naibata do, ai seng dong na so tarbahen Naibata”.

(Markus 10 : 27)

Aha na so tarbahen jolma? Seng tarbahen jolma paluahkon dirini humbani dousani. Tapi na so tarbahen jolma ai tarbahen Naibata do: Tarbahen Naibata do paluahkon hita humbani dousanta, tarbahensi do mambere hagoluhan na sadokah ni dokahni banta.

Domma iahapkon ham pambahen ni Naibata paluahkon ham? Bere ham ma uhurmu topaon ni Tonduy ni Naibata ase iahap ham idop ni uhur ni Naibata na paluahkon ham.

Anggo ilajou ham maruntol papintor dirimu ilobei Naibata, gabe jut do uhurmu, ai sagala hapintoron ni dirimu seng asi iahap ham. Tongon pe seng asi ai. luji jolma papintor dirini, sai hagedukon do taridah ilobei ni Naibata. Seng tarbahen jolma, tapi tarbahen Naibata do. Sai hagedukon do manggoki uhurta sonai age pingkiranta. Ase sabonar seng boi bahenonta hita pintor. Tapi na so boi ai ibahen hita boi do ai bahenon ni Naibata. Tuhan Jesus do hapintoron ai. Anggo ijalo uhurmu Tuhan Jesus janah ihaporsayai ham sitaronon pakon parmatei ni Tuhan Jesus ai ma galar utang dousanta, ai ma gabe hapintoronmu ihira Naibata. Seng tarsasap jolma dousani tapi tarsasap Naibata do. Seng tarpapintor jolma dirini, tapi tarpapintor Naibata do marhitei Tuhan Jesus. Seng tarpaborsih jolma dirini, tapi tarpaborsih Naibata do. Na so tarbahen jolma, tarbahen Naibata do.

Halani ai Naibata na margogoh ai ma pangunsandeanta, Ia ma hatundalanta, Ia ma pangadu-aduanta bani ganup sinarihon ni uhurta. Ai holong do uhur-Ni mangidah hita, ai tinompa-Ni do hita.

Ase seng patut dihut be uhur ni halak Kristen atap pasal aha pe, halani sirsir hatundalanni na lobih gogoh, na lobih pandei, na lobih sangap, na lobih markuasa. Na so tarbahen jolma tarbahensi do.

Tonggo

Ham Tuhan Naibata. Pargogoh na so tarimbang! Na margogoh do Ham paluahkon ahu humbani kuasa ni dousa. Urupi Ham ma ahu ase maluah ahu marhitei Anakmu na Pansing in. Amen.

Doding

Haleluya No. 107: 5,7: Irikkon Nasiam ma Au >>

5. Seng na tarbaen hanami in, ipingkir uhurnima;
Ulang mabiar halanin, Au do hasomannima.
taluhonon-Ku munsuh in, tenger uhurmu pasal in.

7. Marmogah-mogah hita bei, lao mangihutkon Jesus.
dagingta ‘ge tonduyta per tulakhon lah bai Jesus;
Ai na mangengkar Tuhan in, seng dapot hasonangan in.

20 Oktober: Pintor Halani Ipintori >>

<< 18 Oktober: “Aha do bahenonku ase dapot hagoluhan sadokah ni dokahni?”