19 Mei: Punsa ni goluh: Parsaoran pakon Naibata

“Anggo dong na horahan, hu Bangku ma ia roh”!

(Johannes 7: 37)

Anggo masihol ham hubani Naibata, roh ma ham bani Tuhan Jesus. Sihol boanon-Ni do ham bani parsaoran pakon Naibata. Ulang tubuh uhurmu mangkatahon:’ “Seng boi ahu roh”, bani Naibata na gokan pansing ai. Botoh ham ma: Ase roh pe Tuhan Jesus mambahen pardomuanta do pakon Naibata.

Sada do na porlu, ningon masihol (horahan) tonduymu marjumpah pakon Naibata, ai do. Anggo sonai roh ma ham bani Tuhan Jesus, marjumpah ma ham pakon Naibata.

Buei do na horahan i tanoh on, tapi horahan bani nadong (materi). Seng piga na horahan pasal parugamaon. Seng piga na horahan mangindahi pardamean pakon Naibata. Seng piga na horahan bani Naibata.

Buei do na mangahap dong do na hurang bani, tapi seng ibotoh torang aha hahuranganni ai. Sadokah lape dompak babou tujuan sibanggalan bani goluh on, seng ra sombuh horahta. Horah-horahan do hita (suali) songon na pane-paneon, ronsi matei tong mangindo minum. Sonai do anggo pasal na i tanoh on do tujuan ni goluhta.

Sihol ma punsa (pansa) ni goluhta: parsaoran pakon Naibata. Dear do bayak hita, dear do sangap hita dear do pentar hita, tapi puangni ai haganupan ningon parsaoran pakon Naibata do. Ai ma indungni, ai ma arihan ni goluhta, ai do hagoluhan na sadokah ni dokahni ai.

Ase jumpah ai, ningon roh do hita bani Tuhan Jesus. Sahalaksi do hansa dong siholang laho marjumpahkon Naibata. Akuhon ham ma ibagas uhurmu, roh do Tuhan Jesus sonari age bamu mangkatahon: “Barang ise na horahan, hu-Bangku ma ia roh minum”. (bd. 4:10; 3 Mus. 23:36.)

Tonggo

Ham Tuhan Jesus! Roh do hanami hu Bamu Sipaluah hanami. Urupi Ham ma hanami Tuhan ase iahapkon hanami banggal ni holong ni ateimu bannami.

Amen.

Doding

Haleluya No. 132: 1.2: Ai Ambit Lang do Ham >>

1. Ai ambit lang do Ham parholong atei Ham huja ma au.
Halani holong-Mu ampakon layak-Mu, hu surga au.

2. Tarima kasih ma Bamu o Naibata parlayak Ham!
Sibahen dalan in marhitei Jesus in hu surga in.