19 Februari: “Masuk ma ho bani pesta malas ni uhur ni tuanmu”

tnt_feb19_mat25_23_hatengeran

“Dear ma ai, ho juak-juak sibujur uhur, hatengeran ni uhur do ho bani na otik, hubahen ma ho hutukpujion bani na buei, masuk ma ho bani malas ni uhur ni tuanmu”.

(Mateus 25 : 23)

(Terjemahan baru, 1976, “Dear ma ai, ale juak-juak sidear uhur anjaha hatengeran. Hatengeran ni uhur do ho bani na otik, ondoskononkon ma buei hubam. Masuk ma ho hubagas pesta malas ni uhur ni tuanmu”!

Ra do nani sonai hata ni Tuhan Jesus use banta? Mangkawah ma ham bani haporsayonmu, atap juak-juak na bujur ham dompak Tuhanta Jesus? Tontu anggo sintong uhurta marbalos, sonon do balosta: Lang! Seng anjai ihatahon bangku sonai, ai pardousa do ahu. Martonggo pe hita ase ibere Naibata gogoh banta andohar gabe juak-juak na bujur hita. Tapi tong do ibagas paruntolon banggal hita. Ai lansei do hita bani hata ni Naibata, lansei dompak Kuria ni Tuhanta.

Anggo mangkawah hita bani pargoluhonta, parlahouta itongah-tongah ni kuria, sonaha mandohori do uhur pakon parlahoumu bani susian ni Tuhan Jesus? Tongtong do holong uhurta bani Tuhanta pakon bani hasoman? Taridah do parsaoranta ari-ari (tanda) na porsaya do hita? Tontu iahap hita do hahuranganta bani ganupan ai.

Halani ai roh ma hita bani Tuhanta mamboan pakon mansopotkon dousanta ai. Pindo hita ma hasasapanni. Ambah ni ai pindo hita ma gogoh na baru laho mambalosi (mangidangi) Tuhanta. Sai iiring-iring pasu-pasuni ma hita. Urupanni do hita ase gabe jolma na baru na marguna gabe juak-juak ni Tuhanta. Sai ibere ma Tonduyni ase gabe juak-juak sibujur uhur hita. Boi hita mandalankon sura-sura ni Tuhanta. Parlajaranta ma ase hatengeran ni uhur hita age bani na otik, andohar das hu banta hata na harga ai halani idop ni uhurni: “Dear ma, ho juak-juak sibujur uhur, hatengeran ni uhur do ho bani na otik, hubahen ma ho hutukpujion bani na buei, masuk ma ho bani malas ni uhur ni tuanmu!”

Tonggo

Ham Tuhan Jesus! Halani Ham tarbahen do ahu gabe juak-juak sibujur uhur. Urupi Ham ma ahu halani holong ni ateimu.

Amen.

Doding

Haleluya No. 148: 2 – 4. Layak do Ham Mambere Au >>

2. Pardousa na banggal do au,
pansing do anggo Ham ;
Sai bai na dorsa laho au
bai na jahat naman.

3. O Tuhan, husopotkon ma
ganupan dousangkin ;
Holong ma Ham, sai sasap ma,
Bamu ma tonduyhin.

4. O, Jesus sai tangihon on,
padaoh Ham jahatkin;
Pansing ma baen Ham uhurhon,
ase sai sonang in.

20 Februari: Lang dong onjolan na legan sobali Jesus Kristus >>

<< 18 Februari: Rudang hamonangan na so ra melus