Nasiam dakdanak, tangihon nasiam ma orangtua nasiam, ai do na pintor. Nasiam bapa, ulang pasoru-soru nasiam niombah nasiam, pagodang-godang nasiam ma sidea ibagas ajar pakon podah ni Tuhan in.
(Epesus 6: 1,4)
Ningon pasangapon ni niombah do orangtua ni sidea, sedo pitah na bujur hansa, age na koras, ai nini Tuhanta ai do na pintor. Na mambalosi hata ni Naibata do dakdanak na pasangap orangtuani, dihut do ai pasangapkon Naibata. Patut do dakdanak marmalas ni uhur mambalosi orangtuani dompak podah na madear. Tapi ulang ma ibalosi dakdanak orangtuani, anggo iajari ia manlanggar hata pakon titah ni Naibata, ihatahon porini marladung atap manangko atap na legan pe.
Hubani orangtua ihatahon Naibata ase ipagodang-godang ibagas ajar pakon podah ni Tuhan dakdanak in. Ia ajar pakon podah ni Tuhan isini haganupan haholongon do. Rap do padalanon ni orangtua ajar pakon podah. Ajar, ai ma pinsang-pinsang atap pukul-pukul, songon uhuman: podah ai ma hata na patugahkon na madear, atap aha atap naija na madear.
Gati do hita orangtua mangkatahon “ulang” anggo ihorjahon dakdanak atap aha. Tapi hurang tarbogei do humbanta hata na madear. Jadi gabe gatian na ulang ma ibogei dakdanak in ase na madear. Artini gatian hita maminsang ase marpodah marhitei hata na nanget-nanget, hatana lam-lam, mamodahi. Tiruanni porini: Gantih ni hata “Ulang erap soban in!” dearan “Dear patumpu soban in”. Pingkironta ma ase buei ibogei sidea hata na madear ase hata na ulang. Dear do hita mangajar dakdanak, ai sonai do nini hata ni Naibata. Tapi anggo tarbahen, sai bueinan ma hita mamodahi niombahta, ai bueinan do siat hata na asok ai, ase sorgang-sorgang na maling.
Tonggo
Ham Naibata Bapa! Pasu-pasu Ham ma sagala urangtua, pasu-pasu Ham homa dakdanak. Urupi Ham ma sidea ase ibotoh mandalankon harosuhmu. Amen.
Doding
Haleluya No. 193: 1, 4, 5. Ise do Anggiku >>
1. Ise do angging-Ku atap botouhin
Nini Tuhan Jesus bai dakdanak in.4. Jesus Tuhan nami torih hanai on!
Na danak hanami na marlajar on.5. Sai padaoh dousa humbannami on,
ase sai dohor ma Ham bannami on.
19 Januari: Manogu-Nogu Dakdanakta Hu Bani Naibata
<< 17 Januari: Aha do arti ni na martumpu marhitei goran ni Naibata?
Recent Comments