“Halani ai huhatahon ma bamu: Domma sasap dousani na buei ai, ai buei do taridah holong ni uhurni, tapi anggo otik do isasap dousa ni halak, otik do holong ni uhurni”.
(Lukas 7:47)
(Terjemahan baru, LAI 1976, “Halani ai huhatahon ma bamu: Domma sasap dousani na buei in, mambahen banggal holong ni uhurni. Halak na otik hona sasap dousani, otik do holong ni uhurni”.)
Sanggah bani parmanganan i pesta Parisei Tuhan Jesus, roh ma sada naboru hu kamar parmanganan ai, halani ibogei ijai Tuhan Jesus. Ai sura-surani ningon pajumpah ia pakon Tuhan Jesus. Bani tujuan ai dobdob do iboan minak na morum ibagas sada hasa alabastar. Sihol minakanni nahei ni Tuhan Jesus. Ningon bahenonni ai bani Tuhan Jesus.
Mase ma nani sonai banggal ni holongni bani Tuhan Jesus? Lang be itimbangi tamuei asal pajumpah ia pakon Tuhan Jesus, na hinaporsayaanni, na hinaholonganni. Ai domma ijalo pasu-pasu humbani Tuhan Jesus.
Aha ma ai nani? On do ai: Sanggah haboratan uhurni janah manaron ibagas partonduyon, holong do uhur ni Tuhan Jesus bani, seng isimbili ia, songon na ibahen ni na legan, ijalo do ia ibagas holong. Isahapkon do pasal holong ni atei ni Naibata bani pardosa. Isasap Naibata do dousa ni sagala na roh hu Bani. Gabe mardamei ma uhurni ibagas, ai ma partolongan banggal bani naboru ai. Ra do Naibata manjalosi, boi ma ia gabe boru ni Naibata.
Halani ai ma ase gara holongni bani Tuhan Jesus, janah maningon dong bahenonni tanda tarima kasih ni uhurni bani Tuhan Jesus.
Ham na mambasa on, atap na manggoluh do ham ibagas sada dousa na mangambat ham roh bani Tuhan Jesus ninuhurmu, atap aha pe halani ase ganggang ham humbani Naibata, roh ma gelah ham bani Tuhanta. Boan ham ganup dousamu ai ijalo Naibata do ham. Iain do ham use gabe niombahni. Tenger ma uhurmu seng itulak ham.
Tonggo
Ham Tuhan Jesus! Tarima kasih ma Bamu, halani ijalo ham do hape pardousa, halani holong ni ateimu na banggal in.
Amen.
Doding
Haleluya No. 150: 1-3. Lauja do Ho na Loja in >>
1. Lauja do ho, naloja in, binaen ni dousamin?
Seng jumpah ho na sonang in, i parlajanganmin
halani in, sai mulak ho!
2. Ompaskon pusok uhurmin bai Tuhan Jesus in.
Sai boban ganup dousamin bai Sipagoluh in.
Nai ma tongon, sai roh ma ho!
3. Ai Jesus do padamei ho na loja in tongtong;
Ai anggo lang hujin ho roh, manaron ma ho tong.
Halani in, sai roh ma ho.
Recent Comments