16 September: Marholong, songon holong ni atei ni Jesus

“Seng iparimbagaskon hasalahan ni hasoman.”

(1 Korintus 13: 5)

(Terjemahan baru: “anjaha seng ipadingat-dingat na jahat”, Ind.,  “Ia tidak menyimpan kesalahan orang lain.”)

Gati do hita ra mamingkiri salah ni hasoman. Anggo ibogei hita hatani atap parlahouni na hurang dear, mamintor roh do banta uhur sogam. Ra ma hita pasambor-sambor hasoman atap manrugihon hasoman pahurangkon sangap ni hasoman.

Bani pingkiran na sonai ai domma mardousa hita dompak holong ni Kristus. Age isogami, age idomdomi halak Jesus, tong do holong-Ni seng mundur. Gari na marsilangkon-Si itonggohon do nini: “Bapa, sasap Ham ma salah ni sidea, ai seng ibotoh sidea binahenni ai.”

Hita susian ni Tuhan Jesus sonari, domma ibotoh hita aha sibahenonta laho mangihutkon bokas ni nahei ni Tuhanta, boi ma hita marpingkir: Sedo na ituntun ai pahirihon ahu, seng iartihon na dob salah ia dompak ahu, halani ai hutonggohon ma ai.

Mahol janah borat do pingkiran na sonai, tapi holong do sintuhunni ai. Anggo banggal holongta tarbahen hita do ai dompak hasoman. Titah ni Tuhan Jesus na mangkatahon: Marsihaholongan ma hita samah hita. Uhur na sonai ai sihol ma Iongkot banta susian ni Kristus.

Sonaha do ase boi iirikkon hita Tuhan Jesus? Pindo hita ma hu Bani, ase songon-Si hita marholong na hapal. Isasap ma dousanta, ipapansing ma hita marhitei Tonduy na Pansing, janah isuan holong na hum Bani ai banta, ase lambin usih hita songon-Si.

Holong ni Tuhan Jesus banta, ai ma mangodohkon uhurta, ase ulang mabitbit hatanta ampa uhurta dompak hasoman na marhahurangan dompak hita. Holong na dob jinalonta, ai ma padalan hita dompak hasomanta.

Buei do na marsalah ai ninuhurta dompak hita seng iahapkon dong salahni banta pala, songon pangahapta ai. Tongon do seng sonai pangonai ni na binahenni ai iahapkon. Marasalihon hasalahan ni hasoman pe domma namin hundear ai, tapi manasap salah ni hasoman banta, ai ma tang sidearan. Dihut do ai homa patambah sonang ni uhurta.

Tonggo

Ham Tuhan Jesus! Buat Ham ma humbangku uhur na majalo-matangkap bani hasalahan ni hasomanku. Ajari Ham ma ahu marholong, songon holong ni atei-Mu, ai susian-Mu do ahu na mangihutkon Ham.

Amen.

Doding

Haleluya No. 194: 1, 3: Sai Sihol Usihanku >>

1. Sai sihol usihanku ham Jesus Tuhankin
Bai toruh ni uhur-Mu lamlam ni Hata-Mu.
Sonaha bahenonku lao mandalankon in
Sai ham ma alo Tuhan manolong ai ijin.

3. Sonaha bahenonku maniru Tuhankin
Gok dousa do uhurhu age angkulangkin.
Urupi au, o Jesus sai sasap dousangkin.
Suanhon bai uhurhu holong ni atei-Mu.

17 September: “Hahologi Hanima ma Munsuhnima” >>

<< 15 September: “Ai ise do goranon hasomanku”