“Tapi na mambahen sangsi sada na etek on, na porsaya Bangku, dearan ma ibatu-baragui ia bani losung batu, anjaha inongnongkon hubagas laut sibagasan”.
(Mateus 18: 6)
Na mambahen sangsi dakdanak, artini na manogu uhur ni dakdanak ai dompak dousa, anjaha ganggang humbani Naibata halani hata atap pambahenan diri. Hatanta atap parlahouta mambahen sangsi uhur ni dakdanak bani hata ni Naibata, bani isi ni Bibel, atap parlahouta ididah dakdanak mambahen hampung uhurni bani Titah ni Naibata, dousanta do ai. Atap ididah dakdanakta dompak arta, tanoh on mando tong uhurta pakon sahapta, lang ongga be dompak datas. lahap dakdanakta do ai. Boi ma ai mambahen pelet langkahni hunjon hujanan.
Payah do gabe partonggo dakdanak anggo seng partonggo urangtuani. Rap magodang ma namin angkula ni dakdanak ai pakon haporsayaonni. Sihol ma namin tartogu dakdanak ai hubani Tuhan Jesus marhitei hatanta pakon parlahouta. Ia lang pe hita manogu dakdanak ai hubani Tuhan Jesus, gendo ulang mambahen parsangsian. Ulang namin halani hita gabe surut atap magou haporsayaon ni dakdanak humbani Naibata, humbani Tuhanta Jesus. Ilumbahon Tuhan Jesus do bani sibahen parsangsian ai: “Dearan ma ibatu-baragui ia anjaha inongnongkon hubani laut sibagasan”.
Situjuonta namin: Hatanta atap parlahouta pe ulang ma manirang atap ise humbani Tuhan Jesus, humbani Naibata, tapi manogu dakdanak age na magodang ma mulak hubani Naibata. Anggo na rapat do hita bani Tuhanta seng marosuh hita ganggang na legan, sihol rapat homa songon hita.
Jaga ma hita ase ulang ibahen hita parsangsian bani dakdanak, ase ulang roh Banta uhuman na borat ai. Tapi ulang ma halani uhuman ai mamaksa hita mardear ni uhur dompak dakdanak, tapi halani holongta bani Tuhan Jesus ma, hita pe sihol mangkaholongi dakdanak homa songon Tuhanta.
Tonggo
Ham Tuhan Jesus! Sasap Ham ma dousanami atap dong parsangsian bani dakdanak ibahen hanami. Urupi Ham ma hanami maniru Ham mangkaholongi dakdanak. Amen.
Doding
Haleluya No. 192:1,5: Haholongi si Parmahan >>
1. Haholongi si Parmahan na dear maruhur in,
Tuhan Jesus do mamorsan, haganupan dousamin.5. Tuhan Jesus do hasoman ni ganup dakdanak in,
Na tongtong marhulanhulan pasangapkon Goran-Nin.
Recent Comments