Jadi marhusor ma Tuhan in, gabe idingat si Petrus ma Hata ni Tuhan in na hinatahonni bani: nape martahuak dayok holi domma tolu hali parnalangonmu Ahu. Laho ma ia hu darat tangis sosombopon.
(Lukas 22: 61, 62)
Domma iparnalang si Petrus Tuhan Jesus sanggah na masuk Ia bani sitaronon mangkopkop hita ampa mangkopkop si Petrus. Domma iluarhon: “Seng hutanda halak ai”. Ijai ma marhusor Tuhan Jesus ikawahkon ma si Petrus.
Pangkawahon ai songon na manarisip, songon na marsahap dompaksi mangkatahon: Domma saud iporsou ho Ahu tene? Tapi tongtong do huhaholongi ho. Domma itadingkon ho Ahu, tapi roh do Ahu hun pudimu paimaima ho ase mulak ho hu Bangku. Sai ulang ma magou haporsayaonmu. Roh ma ho hu Bangku, husasap pe dousamu. Mulak ma ho hu Bangku, hubere pe bam gogoh ase totap ho Bangku. Idingat ma singat-singat ni Tuhanta in, iahap ma dousani. Jadi laho ma ia hudarat tangis sosombopon.
Tuhan Jesus na ibagas sitaronon, idingat do susianni na dob mardousa. Sonai do Tuhanta ronsi sonari on. Idingat do hita, seng surut holong ni atei-Ni banta, sai ikawahkon do hita ibagas holong-Ni.
Anggo mardousa hita dompak Naibata anjaha itadingkon hita Ia, roh do Ia mangkawahkon hita ibagas holong-Ni, ase mulak hita Bani.
Ase anggo tarsor mardousa ham hatahon ham ma ibagas uhurmu: Ikawahkon Tuhan Jesus do ahu, ipaima-ima do parmulakku hu Bani. Na bayak do Tuhan Jesus bani holong, na buei do idop ni uhurni. Tapi sopotkon ham ma dousamu, tangiskon ham ma dousamu songon si Petrus, ase ijalo ham.
Tonggo
Ham Tuhan Jesus! Tarima kasih ma Bamu, halani lumbang ni uhurmu pakon holong ni ateimu. Ikawahkon Ham do hanami anggo mardousa use mulak hanami. Patenger Ham ma uhurnami pasal ai.
Amen.
Doding
Haleluya No.148 : 1- 3. Layak do Ham Mambere Au >>
1. Layak do Ham mambere au, O Jesus Tuhankin,
Ihutkon Ham daoh pe au, mambuat uhurhin.
2. Pardousa na banggal do au, pansing do anggo Ham ;
Sai bai na dorsa laho au bai na jahat naman.
3. O Tuhan, husopotkon ma ganupan dousangkin;
Holong ma Ham, sai sasap ma, Bamu ma tonduyhin
Recent Comments