“Anggo seng tubuh halak paduahalihon, seng tarbahensi mangidah Harajaon ni Naibata”.
(Johannes 3: 3)
Ai ma balos ni Tuhan Jesus bani si Nikodemus na roh borngin-borngin hu Bani. Halak Parise do si Nikodemus on. Bulinsah do uhurni atap sedo na marosuh Naibata mangidahsi. Ai ma ase iuji mangkorjahon horja na madear ase dapotsi idop ni uhur ni Naibata. Iuji do mandalankon podah ai ase pintor ia humbani parombouni sandiri. Tapi tong do iahapkon seng sungkup sonai hapintoronni. Seng ope sintong dalanni ai. Ai ma dalanni ase roh ia bani Tuhan Jesus. Ijalo do ia ibagas na basar, janah ibere bani arihan banggal.
Anggo horja do mangombou hapintoron seng marguna, uhurmu do sipaubahonmu: Ningon tubuh ham paduahalihon marhitei bah pakon tonduy. Anggo seng tubuh paduahalihon seng tarbahen masuk hu harajaon ni Naibata, mangidah pe seng boi.
Anggo isungkun hita sonaha do na tubuh paduahalihon?
Sabotulni seng arti hita sonaha parjadi ni ai. Seng ibotoh hita roh Tonduy ai hubagas uhurta anjaha itompa uhur na baru ibagas uhurta, na mangkaholongi Naibata jolma.
Anggo marianan Tonduy ai ibagas uhurta gabe tinompa na baru do hita. Ipatubuh Tonduy ai do ibagas uhurta malas ni uhur mangkorjahon na madear, janah ibere gogoh hujai. Ase gantih ni jolma sisapari ai, domma tartompa jolma na baru. Na so sintong hinan gabe sintong ma use. Na manundalhon Naibata gabe mandompakkon Naibata ma. Pardomdom gabe parholong, na so basar hinan gabe na basar, sonai pakon hauhuron na legan.
Domma tubuh ham paduahalihon? Domma ibere ham kamar ni Tonduy na Pansing ibagas uhurmu, ibagas goluhmu?
Paturut ham ma itompa janah itopa tonduy ai uhurmu ase gabe jolma na baru ham.
Tonggo
Tompa Ham ma uhur na borsih ibagas ahu Ham Naibata janah pabayu Ham Tonduy na totap ibagas ahu.
Amen.
Doding
Haleluya No. 95: 3,4: Jesus, Roh Hanami on >>
3. Halaniin tarudu do parrohnami on, o Tuhan
Ase odos ma Bamu poso-poso on ganupan
Hagoluhan ma rupeini, janah gok Bamu dirini4. Burih Ham tonduyni in bani daroh-Mu, o Jesus!
Ben pansing uhurni in sura-sura-Mu ma saud
Hapintoran-Mu ma bani, anak-Mu ia homani
Recent Comments