“Anggo seng tubuh halak paduahalihon seng tarbahensi mangidah Harajaon ni Naibata. Anggo seng tubuh halak humbani bah pakon tonduy, seng boi ia masuk hu Harajaon ni Naibata. Daging do na tubuh humbani daging tonduy do na tubuh humbahi tonduy”.
(Johannes 3:3, 5, 6, Terj Lama)
Na tubuh do hita paduahalihon marhitei bah pakon Tonduy, sanggah na tardidi hita. Gabe songon na baru tubuh do hita pasal partonduyon. Roh do Naibata hu banta manompa goluh na baru ibagas uhurta. Ninuhur ni Naibata sihol marianan Tonduy ni Naibata ibagas uhurta, sonai ampa hagogohon-Ni ronsi idop ni uhur, ase torsa pingkiranta, hatanta pakon parlahouta, pasirsirhon hita bani ari ni Tuhan Jesus Kristus.
Tapi dong do homa na mangahapkon, age pe domma tardidi ia seng dong marianan goluh na baru ai ibagas uhurni, seng dear parlahouni, seng ope marosuh ia mandalankon Hata ni Naibata.
Halak sisonai ai rosuhni do ibahen mangimbang rosuh ni Naibata. Marhorja do Tonduy ai namin tapi ilawan do, ibalosi do dagingni ampa uhurni hinan.
Tapi halak na manggoluh marguru bani dagingni na laho hu hamagoan ma ai. Aha do sibahenon ni jolma na sonai ai? Mulak ma ia bani Naibata, ijalo ma uhur na baru, ilawan ma uhur sapari ai. Mangkawah ma ia bani Jesus na tarsilang ai na dob mangkopkopsi, ijalo ma hasasapan ni dousani, iihutkon ma Naibata ase manggoluh ia.
Mangkawah ma ham bani Tuhan Jesus na tarsilang ai na matei halani dousamu janah na mulak manggoluh, ase marpangarapan na manggoluh hita.
Jolma na baru na dob tubuh paduahalihon ai, etek do ope ai songon dakdanak na etek porlu patorsa-torsaon, porlu mangan hata ni Naibata, ase tambah banggal ni haporsayaonni.
Tonggo
Napuji ma Naibata, Bapa ni Tuhan Jesus Kristus na dob mantubuhkon hita paduahalihon humbani banggal ni idop ni uhurni hubani pangarapan na manggoluh marhitei parpuhoon ni Jeus Kristus humbani na matei.
Amen.
Doding
Haleluya No. 96: 1,3: Seng Au Ompungi Ahu >>
1. Seng au ompungni ahu hubere diringkon
bai Tuhan in Rajangku sigomgom tanoh on
Ai bai dirini Jesus au ididah Naibatangku
Na pasonang au3. Seng au ompungni ahu dob na tardidi au
bai goran ni Tuhanku na marhioui au
mardomu au bai Jesus in rap pakon Kuria-Ni
ginomgoman-Ni in
Recent Comments