14 April: Mangkaporsayai anjaha mangkaholongi Tuhan

Jadi ibuat si Maria ma sakati minak nardus na maharga na so maragu, iminaki ma nahei ni Jesus dob ai isapuhon ma jambulanni use, jadi igoki misbou ni minak in ma rumah ai

(Johannes 12: 3)

Na hundul do si Maria ilambung nahei ni Tuhan Jesus, manangi-nangi hata-Ni. Domma iguruhon mananda Tuhan Jesus Tuhanni ampa Sipaluahni. Holong do uhurni Bani humbani gok ni uhurni.

Santorap on roh Jesus hu huta ni sidea. Sihol idahonni ma Ia jinuljul ni holongni. Halani buei ni na binahenni hubani sandiri. Ibuat ma minak nardus na maharga iminaki ma la, tapi sedo pitah uluni dihut do naheini janah ilap marhitei jambulanni. Tapi ihata susian ni Tuhan Jesus ma ai. Mase pala marlobih-lobih sonai ibahen. Tapi iapiti Tuhan Jesus do ia, nini: Paturut ma ibahen do ai songon pananom Bangku. Ai ididah Tuhan Jesus do holong ni uhurni bani Tuhan Jesus ampa haporsayaonni ase pala sonai ibahen. Bani panorang ai domma iahap Tuhan Jesus laho mandalani sitaronon ma la ampa hamatean.

Sonari na porlu sungkunonta ma uhurta: Holong do uhurta bani Tuhan Jesus songon si Maria ai? Banggal do uhurmu halani pangkopkop ni Tuhan Jesus bamu. Ra do ham mangidangi-Si songon si Maria ai? la na dob mangkopkop ham pakon manasap dousamu? Domma iahap ham malas ni uhur na binahen ni Tuhan Jesus bamu?

Pindoonta ma bani Tuhanta ase itambahi haporsayaonta pakon holong ni uhurta Bani, ase lambin banggal.

Tonggo

Ham Tuhan Jesus! Arung na dob marosak seng iponggolhon Ham janah sumbu na millop-illop seng iilohkon Ham. Kawahkon Ham etek pakon otik ni haporsayaonnami ampa holong ni uhumami Bamu. Ase ibotoh hanami mambalosi pakon mangidangi Ham, humbani putih ni uhumami.

Amen.

Doding

Haleluya No. 18: 1, 2. HataMu, ale Tuhanku >>
1. Hata-Mu ale Tuhanku, arta siharganan ai
Sai palongkot bai uhurhu, ulang lang hujolom ai
Anggo seng be sijoloman Hata na madear ai
aha ma na baen onjolanni haporsayaonkin

2. Ale Jesus sai kawahkon, sai parorot Ham au on
‘Se totap haporsayaon mangiankon uhurhon
Sai paringgas Ham uhurhu, manangihon Hata ai
Sai horahan bai podah-Mu, songon si Maria ai

15 April: Sura-sura Pamuliahon Naibata >>

<< 13 April: Mangihutkon Rosuhta atap Rosuh-Ni?