13 Mei: “Ulang ma Tonjan Uhurnima”

tntmei13_ulangtonjan_joh1_14

“Ulang ma tonjan uhurnima! Porsaya ma hanima bani Naibata, anjaha porsaya ma homa Bangku”!

(Johannes 14 : 1)

Buei do i dunia on na i bagas pusok ni uhur, jut ni uhur dobni gabe tonjan. Deba halani dousa deba halani hahurangan, deba hurang ni haporsayaon, deba maruntol pasal dousa. Jadi lang sonang be. Dong deba halani pakara ipareksa polisi, ipareksa jaksa das hu pengadilan. Age anak ni Naibata hita ra do masa banta sisonai ai, songon na sirang humbani Naibata.

Bani panorang sisonai ai porlu tangaron hata ni Tuhan Jesus na iatas in: “Ulang ma tonjan uhurnima! Porsaya ma hanima bani Naibata, anjaha porsaya ma homa Bangku”! Ingat ham ma seng uhumon hita halani parlahouta, tapi halani na so porsaya do hita ase iuhum. Anggo ihaporsayai hita na dob iporsan Jesus ganup dousanta hubanni hayu ai (parsilang ai). lhaporsayai hita na matei la halani dousanta janah puho la ase gabe pintor hita, jadi jaloon ni Naibata ma hita gabe anakni (boruni) ase mulak hu rumahni marhitei Jesus.

Ulang hampung uhurmu pasal dousamu. Tapi ulang pala bangkir be uhurmu pakon hurang ni haporsayaonmu na dob in. Tapi hunjon hujan lambin rapat ma ham pakon Naibata ampa Sipaluah in. Pindo ham ma bani Naibata ase totap uhurta bani arihan ni haporsayaonta: Na matei do Tuhan Jesus halani dousanta. Sasapon ni Naibata do dousanta halani Tuhan Jesus. Jolom hita ma ai poltik ase ijalo Naibata hita hu nagoriatas, hu rumah ni Bapanta ai dob salpu goluh on.

Haporsayaon do paluahkon hita humbani uhur na tonjan, uhur na jut age pasal aha pe. Haporsayaon ai mangkatahon: Patorsaon ni Naibata do ahu. Ra do Naibata patorsa ahu, tuk do homa gogoh-Ni paturei ahu.

Tonggo

Ham Tuhan Naibata! Bere Ham ma bangku gogoh ase poltik hujolom Ham. Anggo tonjan ahu ulang tadingkon Ham ahu. Palumbang Ham ma pangahapku.

Amen.

Doding

Haleluya No. 130 : 4,6: Ai Domma Jumpah Au Ondolan >>

4. Domma mogap ganup dousanta bai darohni Tuhanta in.
Ai anggo porsaya do hita seng bulih hona uhum in.
Ibaen hata ni daroh in na mangkahui jolma in.

6. Ondolan on ma iananku, sadokah au itanoh on.
Sai in ma hagoluhkononku paima rotap hosahkon.
Tongtong do sipujionkin Tuhanku, Sipagoluh in.