“Tapi Tonduy ai pe iurupi do hita bani hagalekonta. Ai seng ibotoh hita atap aha na patut pindoonta. Tonduy ai do na marnagodangkon hita marhiteihon holsoh na so tarhatahon”.
(Roma 7:28, Terj lama)
Dong do panorang bani halak Kristen iahapkon ibagas pusok ni uhurni, mahol tumang ia martonggo. Seng dong be uhurni dompak Naibata. Pingkiran na legan do roh hu bani. Seng roh bani pardingatanni pasal Naibata.
Bani panorang na sonai isuruh Naibata do Tonduyni, tonduy partonggoon, laho mangurupi hita laho martonggo, laho mangajari hita pasal sitonggoonkonta.
Iojur ma hita ase roh bani Naibata marhitei goran ni Tuhan Jesus.
Anggo domma iahap hita dohor Naibata, hape seng nabotoh atap aha siluaronkon ibahen gok ni uhurta, ijai ma ipatibal Tonduy ai hata siluaronkonta hubagas uhurta, ase naluarhon bani Naibata. Inspirasi ni Tonduy ai ma nasahapkon bani Naibata, gabe malas ma uhur-Ni manangihon, ai itangar Naibata do hata ni uhurta. Iarusi do holsohta. Ibalosi ma elek-elekta. Sedo pitah hagalekonta ididah, ididah do pakon bujur ni uhurta.
Buhai hita ma uhurta bahen ianan ni Tonduy ai, ase lalab marianan Ia ibagas uhurta, manrajai ibagas goluhta. Ase bani panorang na songon iahap ham seng tarbahen ham be martonggo, bani panorang ai ma isuruh Naibata Tonduyni bamu ase iajari ham martonggo bani Naibata.
Halani ni ai ulang be hita mandolei age sonaha sitaronon. Ambah ni ai anggo lang be ibotoh ham atap aha luaronkonmu, iajari Tonduy ai do ham manluar, ibere (ipodahkon) do hata luaronkonmu.
Porini roh pe ham jornok hu lobei ni Naibata laho martonggo namin, hape seng ibotoh ham aha luaronkonmu, isi ni uhurmu ai pe ididah do, pangindoan ni uhurmu ai pe ibalosi Naibata do.
Tonggo
Ham Tonduy na Pansing! Roh ma Ham marianan hubagas uhurhu, ajari Ham ma ahu roh hu bani Naibata, ajari Ham ma ahu marsahap bani Naibata.
Amen.
Doding
Haleluya No. 84:1,2: >”>Ale Tuhan Bapanami >>
1. Ale Tuhan Bapa nami na marholong atei in.
Suruh Ham ma hu bannami Tonduy-Mu Na Pansing in.
Ham pabayu tonduyhin jadi rumah-Mu ma in.
Tangar Ham pangindoanku holong atei-Mu hu bangku.2. Lang adong hagoluhanku anggo seng roh Tonduy-Mu,
marianan bai uhurhu ase tong margogoh au.
Mandalankon hata-Mu manghormati goran-Mu;
Ai tongtong golap uhurhu Ham hansa palihar ahu.
Recent Comments